Պաշտոնական այցով Հայաստանի Հանրապետություն ժամանած ԵԱՀԿ գործող նախագահ, Շվեյցարիայի Համադաշնության նախագահ, արտաքին գործերի դաշնային դեպարտամենտի ղեկավար Դիդիե Բուրկհալտերի եւ ՀՀ նախագահ Սերժ Սարգսյանի հանդիպումից հետո նախագահները կարճ ճեպազրույց ունեցան:
ՀՀ նախագահ Սերժ Սարգսյանն ասաց, որ հանդիպման ժամանակ քննարկվել են հայ-շվեյցարական համագործակցության լայն շրջանակ: Երկու նախագահներն անդրադարձել են նաեւ տարածաշրջանային եւ միջազգային անվտանգության արդի մարտահրավերներին եւ փոխգործակցությանը:
Նախագահ Սարգսյանը գտնում է, որ Հայաստանի եւ Շվեյցարիայի միջեւ դիվանագիտական հարաբերությունների հաստատումից ի վեր արդյունավետ աշխատանք է ընթացել եւ կառուցողական երկխոսություն է ծավալվել խորհրդարանների եւ արտաքին գերատեսչությունների միջեւ:
ՀՀ նախագահը դրական է գնահատում երկկողմ առեւտրի կայուն աճը. եվրոպական երկրների շարքում Շվեյցարիան Հայաստանի գործընկեր երրորդ երկիրն է: 40 ընկերություններ արդեն իսկ համագործակցում են: Նախագահ Սարգսյանը դրական գնահատեց Ցյուրիխում մայիսին կայացած հայ-շվեյցարական գործարար համաժողովի արդյունքները: Համաժողովի երկրորդ փուլը կկայանա առաջիկայում Երեւանում:
Կարդացեք նաև
Նախագահ Սարգսյանը նաեւ վերահաստատեց ԵԱՀԿ-ի հարթությունում համագործակցությունը խորացնելու Հայաստանի ցանկությունը: Ասաց, որ Հայաստանը պատրաստ է սատարել Շվեյցարիայի նախաձեռնություններում`ԵԱՀԿ-ում իր նախագահության շրջանում:
Սերժ Սարգսյանը հայ ժողովրդի անկեղծ երախտագիտությունը հայտնեց Շվեյցարիայի նախագահին` Շվեյցարիայի օրենսդիր մարմնի կողմից Ցեղասպանությունը ճանաչելու փաստի առիթով: Թեեւ Թուրքիայի կողմից չվավերացվելու պատճառով մինչ օրս առկախված են հայ-թուրքական արձանագրությունները, այնուհանդերձ, նախագահ Սարգսյանը շնորհակալություն հայտնեց Շվեյցարիային`այդ ուղղությամբ իր գործադրած ջանքերի համար: «Թուրքիայի կողմից Հայաստանի ապօրինի շրջափակումը պետք է մնա միջազգային հանրության ուշադրության կենտրոնում»,- հայտարարեց ՀՀ նախագահը:
Դիդիե Բուրկհալտերն էլ ասաց, որ վերահաստատում է Սերժ Սարգսյանի կարծիքն այն մասին, որ հայ-շվեյցարական երկկողմ հարաբերությունները բարեկամական են: Նա հայտարարեց, որ շահագրգռություն կա տնտեսական համագործակցությունը խորացնելու` մասնավոր եւ պետական հատվածում:
Շնորհակալություն հայտնեց այն կայուն աջակցության համար, որն իր երկիրը ստանում է Հայաստանից` ԵԱՀԿ-ում իր նախագահության շրջանում:
Նելլի ԳՐԻԳՈՐՅԱՆ
