Գնաճային միջավայրն այս տարի բարեհաջող է դասավորվել Կենտրոնական բանկի համար։ Տարեսկզբին պարենային ապրանքների շուկաներում չկան մեծ ճնշումներ։ Ավելին՝ արտաքին հատվածում դիտարկվում են երեւույթներ, որոնք դրական սպասումներ են թողնում ներքին գների վրա։
Մասնավորապես գնաճային ճնշումներ գրեթե չեն սպասվում պարենային այնպիսի ապրանքների շուկաներում, ինչպիսին է հացահատիկը, բրինձը եւ շաքարավազը։ Սպառման նկատմամբ արտադրության առաջանցիկ աճով պայմանավորված՝ միջինժամկետ հատվածում կանխատեսվում է հացահատիկի գների կայունացում։ Նույնպիսին են սպասումները նաեւ բրնձի դեպքում։ Տեւական ժամանակ արձանագրվող անկումից հետո շաքարավազի շուկայում դիտարկվում է գնաճային թույլ ճնշումների հավանականություն։
Արտաքին միջավայրում ձեւավորված այս իրավիճակը նպաստավոր ազդեցություն է թողել ԿԲ կողմից իրականացվող դրամավարկային քաղաքականության վրա։ Պատահական չէ, որ վերջին մի քանի ամիսներին Հայաստանում արձանագրվում է վերաֆինանսավորման տոկոսադրույքի նվազում։ Վերջին անգամ Կենտրոնական բանկը այդ քայլին դիմեց մայիսի սկզբին։ Ակնկալվում է, որ այդ միտումը կշարունակվի նաեւ առաջիկայում։
Հատկապես որ սպառողական ապրանքների շուկայում թուլանում է գնաճային ճնշումը։ Մասնավորապես մայիսին վիճակագրական ծառայությունը 12-ամսյա հատվածում գրանցել է 3,6 տոկոս գնաճ։ Նախորդ ամսվա նկատմամբ գնաճի մակարդակը նվազել է։ Հիշեցնենք, որ ապրիլին այն 4,4 տոկոս էր։
Կենտրոնական բանկի կանխատեսումների համաձայն, այս միտումը կխորանա առաջիկայում՝ պայմանավորված անցած տարվա հուլիսից էներգակիրների թանկացման ազդեցության չեզոքացմամբ։ Ըստ այդմ, գնաճը կլինի նախատեսված թիրախային ցուցանիշի ներքին սահմանին մոտ։
Կարդացեք նաև
Վասակ ԹԱՐՓՈՇՅԱՆ
Հոդվածն ամբողջությամբ՝ «Հայոց աշխարհ» թերթի այսօրվա համարում
