Հայոց պետականության տոնի առթիվ «Մովսես Խորենացի» մեդալով պարգեւատրվեց նաեւ Երեւանի թիվ 164 դպրոցի ուսուցչուհի Քնարիկ Գրիգորյանը, որը ավելի քան 40 տարի է` աշխատում է հանրակրթության ոլորտում: Տիկին Քնարիկի խոսքով. «Կարծես լավագույն աշակերտի նման ես էլ ստացա իմ բարձր գնահատականը: Չնայած այն պարտավորեցնող է, բայց նաեւ իմ քրտնաջան աշխատանքի արդյունքն է»: Հարցին՝ որեւէ խորհուրդ ունե՞ր իր համար այդ պարգեւը Սարդարապատում ստանալը, ուսուցչուհին պատասխանեց. «Այո, որովհետեւ Սարդարապատի հուշահամալիրը սրբատեղի է ողջ հայության համար: Հատկանշական է, որ այդ սուրբ կամարների տակ պարգեւատրվեցին ոչ միայն հայաստանաբնակ, այլեւ սփյուռքահայ շատ արժանավոր զավակներ»:
Քնարիկ Գրիգորյանը հավելեց, որ շատ կուզենար վերականգնել ուսուցչի պատվավոր անունը: «Ուսուցիչն այսօր ոտնահարված է, ճնշված, սոցիալապես անապահով, ցածր աշխատավարձով եւ ծով ծանրաբեռնվածությամբ: Մինչդեռ դարեր ի վեր ուսուցիչն է ամուր պահել հայ դպրոցը` ազգի ողնաշարը եւ իր կրթած ու դաստիարակած սաներով աներեր պահել մեր երկրի սահմանները: Մեր շարքերում շատ կան ուսուցիչներ, որոնք իրենց աշխատանքային բնագավառում գալիս են, լույս տալով սպառվում ու գնում` առանց որեւէ գնահատականի արժանանալու: Շատ ուրախ եմ, որ ինձ հետ միասին «Մովսես Խորենացի» պարգեւի արժանացավ եւս ութ վաստակաշատ ուսուցիչ»,- հավելեց մեր զրուցակիցը:
ԱՆԱՀԻՏ ՄԱՆՈՒԿՅԱՆ
«Առավոտ» օրաթերթ
03.06.2014
