Մի քանի օր առաջ ՀՀ նախագահ Սերժ Սարգսյանը Ծաղկաձորում ՀՀԿ երիտասարդական կազմակերպության հաշվետու հավաքի ժամանակ, պատասխանելով Աստանայում Նուրսուլթան Նազարբաեւի պահանջին, հայտարարել էր՝«Նախ այն գլխից սխալ է սահմանների մասին խոսելը: Ի՞նչ սահմանների մասին ենք խոսում: Ղարաբաղի խնդիրը Մաքսային միությունում չի լուծվում: Իսկ ո՞վ է ասել, որ մենք Ղարաբաղով ենք մտնելու Մաքսային միություն»:
Այն, որ Ղարաբաղի խնդիրը Մաքսային միությունում է լուծվելու՝ իրականում մեզ բոլորիս վստահեցրել են ՀՀԿ-ի կարկառուն դեմքերը՝ արդարացնելով Սերժ Սարգսյանի՝ սեպտեմբերի 3-ի քայլը՝ Մաքսային միություն մտնելու:
«ԼՂՀ-ն եւս ունենալու է հնարավորություն՝ օգտվել Մաքսային միության հետ ինտեգրման գործընթացներից: Չեմ ուզում դետալների մեջ մտնել, թե ինչպես է դա տեղի ունենալու, բայց դա այն քաղաքական կողմնորոշիչներից, այն հանգամանքներից է, որի արդյունքում մենք ընտրեցինք Մաքսային միությունը»,- դեկտեմբերի 13-ին եվրոպական ինտեգրացման մասին միջազգային համաժողովի ժամանակ այսպես էր վստահեցրել ԱԺ արտաքին հարաբերությունների մշտական հանձնաժողովի նախագահ Արտակ Զաքարյանը:
Նա Մաքսային միություն մտնելը կապել էր ղարաբաղյան խնդրի հետ՝ վստահեցնելով, թե ինչ Սերժ Սարգսյանը հայտարարել է ՄՄ մտնելու մասին, Ադրբեջանը թուլացրել է հակահայկական հռետորաբանությունը. «ՄՄ-ին անդամակցելը՝ ԼՂ պահով ճիշտ որոշում էր»:
Կարդացեք նաև
Արտակ Զաքարյանը մի քանի անգամ տարբեր լրատվամիջոցների հետ զրույցում վստահեցրել է, որ ՄՄ մտնելը նպաստելու է ԼՂ խնդրի կարգավորման գործընթացին:
Նրա հետ համակարծիք է նաեւ ՀՀԿ խմբակցության պատգամավոր Խոսրով Հարությունյանը: Panorama.am-ի հետ զրույցում նա նույնպես չի բացառել, որ ԼՂ հակամարտության խաղաղ կարգավորման գործընթացի նոր փուլ կսկսվի՝ ՄՄ մտնելով:
Հռիփսիմե ՋԵԲԵՋՅԱՆ
Արտակ Զաքարյանը քանի անգամ է ի վիճակի տեսակետ փոխել ու տրամագծորեն հակառակ բաներ ներկայացնել այնպես կարծես բոլորը միանման հավի ուղեղ ու հիշողություն ունեն… հերիք է մեզ վիրավորեք, դուք երբեք չեք վիրավորվում “ճկուն” ու անսկզբունքային լինելուց…. ընդհանրապես սերնդաթոխությունը տարիքային չի, որովհետև պարզվում է երտասարդ բրեժնեվներ շատ կան, իսկ մի հատ Սոլժենիցին կամ Սախարով այդպես էլ չունեցանք, ունենք մենակ հարմարվող պլաստիրինից ճամարտակներ…