Իսկ ո՞վ է ասել, որ մենք Ղարաբաղով ենք մտնելու Մաքսային միություն: Այդպիսի բան չի եղել և չի էլ կարող լինել, որովհետև Ղարաբաղը գոնե մեր օրենսդրությամբ, գոնե մեր պատկերացումներով Հայաստանի մաս չէ այսօր կազմում»,- ՀՀ նախագահ Սերժ Սարգսյանը Ծաղկաձորում ՀՀԿ երիտասարդական կազմակերպության հերթական հաշվետու հավաքի ժամանակ այսպիսի հայտարարություն էր արել՝ պատասխանելով Նուրսուլթան Նազարբաեւի առաջ քաշած պայմանի շուրջ բարձրացված աղմուկին:
Բնականաբար, Սերժ Սարգսյանի այս հարցն ունի հստակ պատասխան: Իսկ ո՞վ է ասել, որ Ղարաբաղով ենք մտնելու ՄՄ՝ ԱԺ նախագահ, ՀՀԿ փոխնախագահ Գալուստ Սահակյանն է ասել: 2013-ի դեկտեմբերի 18-ին «Ժողովուրդ»-ի հետ զրույցում նա հայտարարել է, որ Հայաստանը Մաքսային միություն է մտնում Ղարաբաղի հետ. «Մաքսային միությանը Հայաստանի անդամակցության դեպքում նույն մաքսային ռեժիմն ինքնաբերաբար կգործի նաեւ Լեռնային Ղարաբաղի Հանրապետության դեպքում»: Ըստ նրա՝ քանի որ Հայաստանը ԼՂՀ-ի հետ առանձին մաքսակետ չունի, հետեւաբար Մաքսային միությանն անդամակցելու դեպքում եւս նույն ռեժիմը պետք է գործի. «Ղարաբաղը համարվում է Հայաստանի սահմանային տարածք: Ոնց որ այսօր է Ղարաբաղը ներմուծում կամ արտահանում, նույն ձեւով էլ կլինի այն ժամանակ: Պրոբլեմներ չեն առաջանա»:
Եվ Գալուստ Սահակյանը միակ ՀՀԿ-ականը չէ, որ Մաքսային միություն մտնելու Սերժ Սարգսյանի հայտարարությունը փորձել է արդարացնել՝ Ղարաբաղը եւ ԼՂ խնդիրն այդ միության հետ կապելով:
ՀՀԿ գործադիր մարմնի անդամ, ԱԺ ֆինանսավարկային եւ բյուջետային հարցերի մշտական հանձնաժողովի նախագահ Գագիկ Մինասյանը նոյեմբերի 29-ին լրագրողների հետ զրույցում հայտարարել էր, թե Ռուսաստանը, Բելառուսը և Ղազախստանը դե ֆակտո ճանաչում են ԼՂՀ-ն որպես Մաքսային միության տարածք: Պատգամավորն ասել էր, որ այդ մասին է վկայում Մինսկի խմբի վերջին հանդիպմանն արված հայտարարությունն այն մասին, որ ՀՀ և ԼՂՀ միջև որևէ մաքսային սահման չկա. «Սա նշանակում է, որ ապրանքները, որոնք մուտք կգործեն Հայաստան, առանց որևէ մաքսային տուրքի կլինեն նաև ԼՂՀ-ում: Այս մոտեցումն արդեն ամրագրված է»:
Հռիփսիմե ՋԵԲԵՋՅԱՆ
Կարդացեք նաև
