Այսօր խորհրդարանում, 2013 թվականի բյուջեի կատարողականի քննարկումների եզրափակիչ նիստի ժամանակ, ԱԺ տնտեսական հարցերի մշտական հանձնաժողովի նախագահ Վարդան Այվազյանը գոհունակությամբ հայտարարեց, որ այս տարի «ռեկորդ ենք խփում»: Պատգամավորի ռեկորդի պատճառը բյուջետային քննարկումների արագ ընթացքն էր: Նա նկատեց, որ ի տարբերություն մյուս տարիների, երբ «5-ից շուտ» չէին ավարտվում աշխատանքները, այս անգամ ավելի արագ կավարտեն: Ի դեպ, այսօր խորհրդարանում քննարկվում էր տնտեսական ոլորտի գերատեսչությունների բյուջեի կատարողականը: «Արդյունավետ» աշխատանքի պատճառն այն էր, որ ինքը`Վարդան Այվազյանը չէր թույլատրում կառավարության ներկայացուցիչներին ամբողջական ներկայացնել իրենց ասելիքը, իսկ պատգամավորներին թույլ չէր տալիս հարցեր ուղղել նրանց:
«Պարոն Շաբոյան, հենց հիմա լավագույն առիթն է ձեզ պարոն Քոքոբելյանի հետ միասին առանձնանալ: Իսկ ձեր տեղը զիջեք Կադաստրի պետական կոմիտեի փոխնախագահին»,- ասաց Վարդան Այվազյանը`ընդհատելով Տնտեսական մրցակցության պաշտպանության պետական հանձնաժողովի նախագահ Արտակ Շաբոյանի ելույթը, ապա թույլ չտալով, որ վերջինս պատասխանի Խաչատուր Քոքոբելյանի`մենաշնորհներին վերաբերվող հարցին:
Նելլի ԳՐԻԳՈՐՅԱՆ
