Ամերիկացի, հոր կողմից հայազգի ռեփեր Ռուսլան Կարաօգլանովը, որի կյանքը երկու անգամ մահից փրկվել է թլպատման շնորհիվ, այժմ իր երգերի միջոցով կրոնական ազատություն է քարոզում, գրում է «Քրիսթիանիթի թըդեյ»-ը:
1980-ականներին փոքրիկ Ռուսլանին թլպատել են Բաքվի մի փոքրիկ կլինիկայում, որպեսզի ազատեն կյանքին սպառնացող ինֆեկցիայից: Սակայն այդ ժամանակ ոչ մեկի մտքով անգամ չէր անցնում, որ հինգ տարի անց թլպատված լինելը կրկին փրկելու է նրա կյանքը:
1990 թվականի հունվարին, որը պատմության մեջ է մտել «սև հունվար» անունով, զինված մարդիկ ներխուժեցին Բաքվի այն բնակարանը, որտեղ ապրում էին Կարաօգլանովները: Նրանք հայ տղամարդկանց էին որոնում՝ սպանելու:
Ռուսլանի հայազգի հայրը և հորեղբայրներն ապահովության համար արդեն փախել էին Մոսկվա: Մոտ 5 տարեկան Ռուսլանը մնացել էր ազգությամբ ռուս մոր՝ Մարինայի և տատի, պապի հետ: Զինված անձիք ավտոմատներն ուղղեցին տղայի վրա:
Կարդացեք նաև
Մայրն արագ իջեցրեց նրա տաբատն ու ցույց տվեց առնանդամը.
«Մենք հայեր չենք: Տեսեք՝ տղաս թլպատված է»,- ասել էր մայրը: Հավատացին, հանգիստ թողեցին:
1990-ականների վերջերին ընտանիքը վերամիավորվեց Մոսկվայում, ապա տեղափոխվեցին ԱՄՆ՝ Սան Դիեգո:
Պատրաստեց Հովհաննես Իշխանյանը
