Ադրբեջանցի քաղաքագետ Զարդուշտ Ալիզադեն՝ անդրադառնալով Ղազախստանի նախագահ Նուրսուլթան Նազարաբևի առաջարկին, որ Հայաստանը Եվրասիական միություն մտնի առանց Ղարաբաղի, ասել է, որ այդ հարցն Ադրբեջանի և Ղազախստանի արտաքին գործերի նախարարությունները վաղուց են քննարկում:
«Հաքքին.ազ» լրատվականին տված հարցազրույցում Ալիզադեն ասել է. «Հավանաբար Բաքուն տեղեկություններ ուներ, որ Հայաստանն այդ միության մեջ է ուզում ընդգրկել նաև Ղարաբաղին, բայց Բաքուն, իր պահանջները ներկայացնելով, ակնարկել է Ռուսաստանին և Ղազախստանին, որ եթե Հայաստանին Ղարաբաղի հետ ընդունեն միության մեջ, ապա խնդիրներ կծագեն իրենց և Բաքվի միջև», – ասել է նա՝ նշելով, որ հաշվի առնելով այդ ամենը՝ Աստանան ստիպված էր բարձրաձայնել Ադրբեջանի նախագահ Իլհամ Ալիևի կոչը:
Մայիսի 29-ին Աստանայում Բարձրագույն եվրասիական տնտեսական նիստի ժամանակ Նազարբաևը հայտնել է, որ Հայաստանը Եվրասիական տնտեսական միությանը պետք է անդամակցի այն սահմաններով, որով անդամակցել է Առևտրի համաշխարհային կազմակերպությանը, այսինքն` Միավորված ազգերի կազմակերպության ճանաչած սահմաններով, ինչը նշանակում է առանց Լեռնային Ղարաբաղի և հարակից շրջանների:
Պատրաստեց Հովհաննես ԻՇԽԱՆՅԱՆԸ
