ԱԺ ՀՀԿ խմբակցության պատգամավոր Մկրտիչ Մինասյանը համոզված էր, որ այսօր Աստանայում Հայաստանը կստորագրի եվրասիական ինտեգրման փաստաթուղթ:
«Անպայման կստորագրվի, իսկ եթե որեւէ խնդիր էլ կա, որը կարող է որոշակի քննարկումների տեղիք տալ, դա չի բացառում, որ հետագայում անպայման կստորագրվի», -այսօր «Ազդակ» ակումբում ասաց պատգամավորը:
Նրա խոսքով, ՀՀ կառավարությունը ճանապարհային քարտեզի բոլոր կետերով համապարփակ աշխատանքներ է տանում. «Հույս ունենք, որ շատ ամենակարճ հատվածում Հայաստանը կդառնա Մաքսային միության անդամ»:
Մաքսային միությունը, նրա կարծիքով, առանձնահատուկ հնարավորություններ ու դաշտ է ստեղծում Հայաստանի համար.«Որ կարողանանք մեր արտադրությունն ու տնտեսությունը զարգացնելու հնարավորությունները ավելի արագ զարգացնել»:
Պարոն Մինասյանը Ֆրանսիայի նախագահ Օլանդի հայաստանյան ելույթից եզրահանգել է, որ Հայաստանը ԵՄ հետ համագործակցելու հնարավորություններ ունի. «Եթե իսկապես Արեւմուտքն ընդունի, որ Հայաստանին պետք է տրվի առանձնահատուկ կարգավիճակ՝ ՄՄ անդամ լինելով՝ միաժամանակ նաեւ ասոցացման նոր ձեւաչափով համաձայնագիր կնքեն ԵՄ-ի հետ, այդ դեպքում Հայաստանի համար նոր դռներ են բացվում, Արեւելք-Արեւմուտք տնտեսական համագործակցությունն իրականացնելու համար»:
Մաքսային միությանը միանալով՝ պարոն Մինասյանի համոզմամբ, Հայաստանի ներքին կյանքում էլ փոփոխություններ կլինեն. «Ավելի մեծ շուկա կունենանք, Ղազախստան, Բելառուս, Ռուսաստան: Նոր շուկան ավելի ընկալելի է քան եվրոպական կամ արեւելյան շուկան, որը բոլորովին այլ ստանդարտներ է ներառում»:
Կարդացեք նաև
Արփինե ՍԻՄՈՆՅԱՆ
