«Իրազեկ եւ պաշտպանված սպառող» հ/կ նախագահ Բաբկեն Պիպոյանն այսօր «Հայացք» մամուլի ակումբում առողջ սննդի համաշխարհային օրվա առթիվ, անդրադառնալով Հայաստանում սննդի անվտանգության խնդիրներին, կարծիք հայտնեց, որ Հայաստանում լավ սահմանված չէ, թե ինչ է սննդի անվտանգությունը:
«Այն, որ մեր երկրում սննդամթերքի անվտանգության վիճակը բավականին ծանր է, երկրորդ կարծիք լինել չի կարող» ,-հայտնեց Բաբկեն Պիպոյանը,- «Մենք առաջնորդվում ենք տեխնիկական կանոնակարգերի մեթոդաբանությամբ, իսկ տեխնիկական կանոնակարգերի մեթոդով շարժվելու պարագայում աշխարհում ոչ մի երկիր չունի սննդի անվտանգություն»:
Պրն Պիպոյանի պնդմամբ` Հայաստանում գործող համակարգը միջազգային ստանդարտների համապատասխան սննդի անվտանգություն ապահովել չի կարող:
Մանրամասն` տեսանյութում
Կարդացեք նաև
Բաբկեն Պիպոյանի կարծիքով, Ազգային ժողովում քննարկվող սննդի անվտանգության վերաբերյալ նոր օրենքի նախագծի ընդունումից հետո էլ համակարգը չի կարողանա լուծել սննդի անվտանգության խնդիրները:
Պրն Պիպոյանի խոսքերով, եթե մարդ երեկոյան չի թունավորվել եւ տեղափոխվել հիվանդանոց, դեռ չի նշանակում, որ այդ սնունդն անվտանգ էր: Բ. Պիպոյանը սա բացատրում է այն հանգամանքով, որ երկրում ապատեղեկատվության մեծ հոսք է տարածվում: Նա նշեց, որ Հայաստանում չկան լաբորատորիաներ , որոնք փորձաքննության կենթարկեն սնունդը` պարզելու՝ արդյոք այն անվտանգ է օգտագործման համար: «Լաբորատորիան մասնավոր բիզնես է նաեւ: Մասնավոր լաբորատորիան, երբ ինչ-որ ցուցանիշ փորձաքննության չի ենթարկում, նշանակում է, որ պետությունը տվյալ ցուցանիշի նկատմամբ անտարբեր է»:
Պրն Պիպոյանը հայտնեց, որ սննդի փորձաքննության չենթարկվելու պատճառով է, որ արդեն այս տարի 4-5 հոգի ելակից թունավորումով տեղափոխվել են հիվանդանոց: Բաբկեն Պիպոյանի խոսքերով` պետք է մշակել այնպիսի համակարգ, որպեսզի վարչական պատասխանատվությունը գերազանցի փորձաքննությանը, պետք է ավելացնել տուգանքների չափը:
Ամռանն ընդառաջ, պրն Պիպոյանը տեղեկացրեց, որ հատկապես կենդանական ծագում ունեցող սննդամթերքը ամռանը դառնում է կրկնակի վտանգավոր, դրանք են՝ մսամթերքը եւ կաթնամթերքը:
Էլյա ՀՈՎՀԱՆՆԻՍՅԱՆ
