«Մեր կարծիքները հաճախ բաժանվել են: Բայց հարցերը լուծվել ու լուծվելու են ոչ թե կոնսենսուսով, այլ քվեարկությամբ»,-այսօր «Հայաստանում սահմանադրական բարեփոխումների նախնական հայեցակարգի թեմայով հանրային քննարկման» եզրափակիչ օրը հայտարարեց ԵՊՀ իրավագիտության ֆակուլտետի դեկան Գագիկ Ղազինյանը:
Նա կոչ արեց բոլորին վեր կանգնել անձնական շահերից ու ներկայացնել մտահոգ քաղաքացու առաջարկություններ ու «ոչ միայն քննադատել, ինչին սովոր ենք բոլորս, այլ առաջարկել լուծումներ»:
Այսօր քննարկումները ծավալվեցին դատական իշխանությանն առնչվող հայեցակարգային մոտեցումների շուրջ: Գագիկ Ղազինյանը նշեց առնվազն երեք պատճառ՝ հասարակական հարաբերությունները, կիրառության փորձը, գործող սահմանադրության արդունավետությունն ու արտաքին գործոնները, որոնց հիման վրա պետք է կատարել սահմանադրական բարեփոխումներ:
ՍԴ նախագահ Գագիկ Հարությունյանը տեղեկացրեց, որ ՀՀ կառավարությունը, ՀՀ նախագահը, ՏԻՄ մարմիններն ընդհանրապես չեն դիմել Սահմանադրական դատարան՝ օրենքների հակասահմանադրականության վերաբերյալ: Այդ հարցով դիմել են միայն դատարաններն ու քաղաքացիները:
Կարդացեք նաև
Գագիկ Ղազինյանը շեշտեց Վճռաբեկ դատարանի տեղն ու դերը, լիազորությունները հստակ սահմանելու կարևորությունը և նշեց. «Տարեկան մոտ քսան հազար քրեական գործերից ընդամենը երեք-չորս հազարն են, որ դատարանները քննում են: Ծայրահեղ հետ իրավիճակում ենք հայտնվել, դատավորը, որ կարող է հետագայում առնչվել այս գործին, չի կարող դատական վերահսկողություն իրականացնել: Ստեղծված դատական համակարգում հաճախ դատավորները քրեական գործերը քննում են իրենց քաղաքացիական գործերը քննելու ընդմիջումներին, կամ ազատ ժամանակ»:
Գագիկ Հարությունյանը նշեց, թե քաղաքացիական հասարակությունում այլ որակների ենք արդեն հանդիպում՝ «մինչև անգամ ընտանիքներում են հակասություններ առաջանում քաղաքական կողմնորոշումների հարցում»: Այնուհետև նշեց. «Մեր նպատակն է այն, որ դատական իշխանության համակարգը, նրա ֆունկցիան լինի ոչ թե իշխանության սպասարկելը, այլ պետաիշխանական գործառույթ իրականացնի, կարողանա հակակշռող դերակատարություն իրականացնել և դառնա արդարադատության երաշխավոր»:
Հարց հնչեց՝ ի՞նչն է խանգարում ՀՀ սահմանադրական դատարանին զսպելու իշխանության ընչաքաղցությունը, ինչո՞ւ չսաստեցին ՀՀ նախագահին և սպասարկում են Սերժ Սարգսյանին: Գագիկ Հարությունյանը պատասխանեց. «Իրավունքից խոսելու ժամանակ պետք է որոշակի պատկերացում ունենալ և առարկայի և բնույթի մասին: Առնվազն 2006-ից հետո 140-ից ավելի օրենքների դրույթներ Սահմանադրական դատարանը հակասահմանադրական է ճանաչել»:
Գագիկ Հարությունյանը նշեց, որ առաջիկայում հայեցակարգը ներկայացնելու են նաև կուսակցություններին:
Այնուհետև հանդես եկավ «Նոր քաղաքական մշակույթ» կուսակցության ղեկավար Անի Զախարյանը: Նա խոսեց պարտադիր կուտակային կենսաթոշակային համակարգի, պահումների, նվազագույն աշխատավարձի մասին, վերահսկիչ պալատի բացահայտումների մասին և հարցրեց՝ արդյոք դա բարոյակա՞ն է: Գագիկ Հարությունյանը պատասխանեց, թե ՍԴ նախագահին նվազագույն աշխատավարձի մասին հարց եք տալիս, դիմում ներկայացրեք, մենք քննեք: Անին, թե «Ամբողջ Հայաստա՞նը պիտի դիմում ներկայացնի»: Գագիկ Հարությունյանը վրդովվեց. «Ավելորդ է Ձեզ հետ հարց քննարկել, քանի որ չեմ կարող իջնել այդ հարթություն»:
Տաթև ՀԱՐՈՒԹՅՈՒՆՅԱՆ
