Թուրքիայում փորձում են վերադարձնել Վանից անօրինական ճանապարհով արտահանված ուրարտական հնադարյան պեղածոները: «Հուրիեթ» թերթի փոխանցմամբ, Վանի Յուզունջու յըլ համալսարանի (ՅՅՀ) հնագիտության բաժնի ուսումնասիրության արդյունքում մոտ 200 հնադարյան նմուշներ, որոնք հայտնաբերվել են արտերկրյա թանգարանների ցուցադրություններում, վերադարձվել և գրանցել են Թուրքիայի մշակույթի և զբոսաշրջության նախարարության հուշարձանների և թանգարանների վարչությունում: Այդ նմուշներից են՝ սեպագիր արձանագրություններ, ոսկերչական և պատերազմական իրեր:
ՅՅՀ հնագիտության բաժնի ղեկավար պրոֆեսոր Ռաֆեթ Չավուշօղլուն ասել է, որ անօրինական ճանապարհով երկրից արտահանած պեղածոները հայտնաբերել են Թոփրակկալեում (Ռուսախինիլի) «գանձերի որսորդները» և ապօրինի պեղումներ իրականացնողները:
Չավուշօղլուի պնդմամբ, Թոփրակկալեում, որը որոշ գիտնականներ համարում են Ուրարտուի երկրորդ քաղաքը և կրոնական կենտրոնը, ապօրինի պեղումներ են կատարել բրիտանացիները, գերմանացիները, ռուսները և նույնիսկ Ճապոնիայի թանգարաններում կարելի է գտնել ուրարտական հնադարյանպեղածոներ, ինչպես նաև ԱՄՆ-ում և Իսրայելում:
Հնագետը հայտնել է, որ նախատեսվում է բացել ուրարտական թանգարան, որտեղ կցուցադրվեն այդ պեղածոները:
Կարդացեք նաև
Պատրաստեց Հովհաննես ԻՇԽԱՆՅԱՆԸ
