Երեւանի քաղաքապետ Տարոն Մարգարյանի բացակայությունը 2013 թվականի բյուջեի քննարկումներին, այսօր կրկին դարձավ ՀԱԿ պատգամավոր Նիկոլ Փաշինյանի եւ քաղաքապետի տեղակալ Կամո Արեյանի երկխոսության պատճառ:
Ի տարբերություն նախորդ տարվա, սակայն, բանավեճն այս անգամ առավել քաղաքակիրթ ընթացավ: Փաշինյանը նախ նկատեց. «Նիստ անելու անհրաժեշտություն չկա, որ իմանաք, թե քաղաքապետարանը կամ մարզպետարաններն ինչքան գումար են ծախսել: Այդ թվերը հրապարակվում են պաշտոնական կայքէջերում: Բովանդակային փոփոխությունների մասին խոսեք, ասենք, ինչպիսի՞ն էր Երեւանը այդ բյուջեից առաջ եւ ինչպիսի՞ն դարձավ»:
Ապա հավելեց. «Հայաստանում պաշտոնյաները «ռանգերի» են բաժանվում: Տարոն Մարգարյանը հերթական անգամ չի ներկայանում այս նիստին: Եթե իրենք գիտեն, որ այս նիստը ավելի պակաս կարեւոր է, թող ասեն`մենք էլ չգանք: Մենք, կներեք, պակաս, զբաղված չենք»:
Կամո Արեյանը բացատրեց, որ Տարոն Մարգարյանը բնավ էլ չի թերագնահատում այս նիստը, պարզապես այս պահին զուգահեռաբար ընթանում է մեկ այլ նիստ`Ցեղասպանության հարյուրամյակի հանձնաժողովում, նա դրան է մասնակցում:
Նելլի ԳՐԻԳՈՐՅԱՆ
Կարդացեք նաև
