«Եթե դա դառնա իրականություն, դա կլինի հիմարություն»,- «Նովոստի» միջազգային մամուլի կենտրոնում կազմակերպված «ԱՊՀ գագաթաժողով. Համագործակցության արդիական օրակարգը» թեմայով Երևան–Մոսկվա–Աստանա–Կիև–Քիշնև տեսակամուրջի ժամանակ այսպիսի կարծիք հայտնեց ԱՊՀ երկրների ինստիտուտի ուկրաինական մասնաճյուղի տնօրեն Դենիս Դենիսովը՝ անդրադառնալով Ուկրաինայի՝ ԱՊՀ-ից դուրս գալու մտադրությանը:
Հիշեցնենք, որ Պյոտր Պորոշենկոյի՝ Ուկրաինայի նախագահ ընտրվելուց հետո երկրի Ազգային անվտանգության և պաշտպանության խորհրդի քարտուղար Անդրեյ Պարուբիյը հայտարարել էր, թե Ուկրաինան սկսում է Անկախ պետությունների համագործակցությունից դուրս գալու գործընթացը:
Այս մասին Դենիս Դենիսովը տեսակամուրջի ժամանակ նկատեց, թե Ուկրաինայի՝ ԱՊՀ-ն լքելու դեպքում խնդիրներ կառաջանան նաև մյուս անդամ երկրների մոտ, քանի որ Ուկրաինան հարյուրավոր համաձայնագրերի կողմ է: Այնուհետև շեշտեց. «Դա Ուկրաինայի համար կնշանակի ազատ առևտրի գոտու դադարեցում ԱՊՀ տարածքում: Կարծում եմ՝ Պորոշենկոն պրագմատիկ անձ է և պետք է այդ ինֆորմացիան կշռադատել և չշարունակի այդ քաղաքականությունն առաջ տանել»:
Ռուսաստանի գիտությունների ակադեմիայի Եվրոպայի ինստիտուտի ԱՊՀ երկրների ռազմավարական զարգացման կենտրոնի ղեկավար, պրոֆեսոր Ալեքսանդր Գուսևը նկատեց, որ Ուկրաինայի՝ ԱՊՀ-ի կազմից դուրս գալը ձեռնտու չէ ոչ Ուկրաինային, ոչ էլ ԱՊՀ անդամ երկրներին ու փաստեց. «Ինչպես նշել է ՌԴ նախագահը, Ուկրաինայի դերակատարությունը մեծ կլինի Եվրասիական տնտեսական միության ստեղծման հարցում: Ուկրաինայի դերը քաղաքական առումով ևս պետք չէ թերագնահատել: ԱՊՀ կազմում մեծ է նաև Ուկրաինայի տնտեսական դերակատարությունը. ԱՊՀ երկրների միջև առևտրաշրջանառության մեկ ութերորդը Ուկրաինայինն է, ուստի Ուկրաինայի կորուստը կլինի շոշափելի:
Կարդացեք նաև
Ուկրաինայի՝ ԱՊՀ-ից դուրս գալը այդ պետությանը ոչ քաղաքական, ոչ տնտեսական և ոչ էլ սոցիալական դիվիդենդներ չի բերի»:
Տաթև ՀԱՐՈՒԹՅՈՒՆՅԱՆ
