Գորիսի ընտրազանգվածի հարգանքը վայելող Գորիսի քաղաքապետի նախկին թեկնածու Տիգրան Կարապետյանի ինքնաբացարկի լուրը շատերին է անակնկալի բերել, սակայն գորիսեցիներին մինչեւ օրս այդպես էլ ինքնաբացարկի պատճառների մասին հստակ պարզաբանում չի տրվել: Շրջանառվող լուրերի համաձայն` ինքնաբացարկի պատճառը ճնշումներն են եղել:
Փորձեցինք նախկին թեկնածուից` «Գամմա» ԲԲԸ գործադիր տնօրեն, անկուսակցական Տիգրան Կարապետյանից, իմանալ, թե այնուամենայնիվ, ո ՞րն է եղել ինքնաբացարկի դիմում ներկայացնելու իրական պատճառը եւ որքանո՞վ են համապատասխանում ճնշումների մասին շրջանառվող լուրերը: «Փակագծերը չենք բացելու: Ստեղծված իրավիճակում սա այն քայլն էր, որից խուսափելն անհնարին էր», -ասաց Տիգրան Կարապետյանը եւ հավելեց, որ այլ մանրամասներ չի կարող ասել:
Ինքնաբացարկի դիմում ներկայացնելուց հետո նա հայտարարությամբ էր հանդես եկել, որտեղ մասնավորապես նշված է. «Նման որոշում կայացրել եմ բավականին երկար ծանր ու թեթև անելուց հետո: Կարծում եմ, որ ինձ ճանաչողներն ու իմ համախոհները կհասկանան ինձ ու զերծ կմնան տարբեր գնահատականներից ու որակումներից: Ուզում եմ շնորհակալություն հայտնել բոլորիդ, յուրաքանչյուրիդ, ով մեր կողքին է, ով սիրում է իր ծննդավայր Գորիսն ու ուզում է այն ծաղկեցնել: Մենք հրաժարվել ենք ընտրապայքարից, բայց չենք հրաժարվել մեր քաղաքը զարգացած, բարեկեցիկ տեսնելու, նաև դարձնելու մտադրությունից: Հուսով եմ, որ միասնականության, բարյացակամության դրսևորումները, ամենաքարքարոտ ճանապարհն անգամ իրար հետ անցնելու պատրաստակամությունը, ինչին մենք ականատես եղանք վերջին օրերին, իսպառ չեն վերանա մեր քաղաքից»:
Երիտասարդ գործարարից հետաքրքրվեցինք, արդյոք պատրաստվո՞ւմ է սատարել ընտրապայքարի մեջ մնացած թեկնածուներից որեւէ մեկին` մասնավորապես անկուսակցական թեկնածու Հրայր Յոլյանին, թե որոշել է որեւէ կերպ մասնակցություն չունենալ գալիք ընտրությանը, զրուցակիցս պատասխանեց, որ հետագա քայլերի մասին կտեղեկացնի մայիսի 28-ին:
Հիշեցնենք, որ թեկնածուների ինքնաբացարկի դիմում ներկայացնելու վերջնական ժամկետը մայիսի 28-ն է` ժամը 18:00-ն:
Կարդացեք նաև
Իսկ այս պահին ընտրապայքարում մնացել են ՀՀԿ-ական Վաչագան Ադունցը եւ անկուսակցական Հրայր Յոլյանը:
Մերի ՍՈՂՈՄՈՆՅԱՆ
Լուսանկարը՝ henaran.am-ի
Եթե ինքնաբացարկ պիտի տաք, ինչի՞ եք մտել ընտրարշավ: Տունի-տունի եք՞ խաղում: Դուք սրանցից բան հասկանու՞մ եք: