ՀՀ բուհերի բակալավրիատի և մագիստրատուրայի շուրջ 30 ուսանողներ այս օրերին մասնակցում են դասընթացների, որոնց ընթացքում ռազմական փորձագետներն ու քաղաքագետները նրանց հմտություններ են փոխանցում բանակային հարաբերությունների, զինծառայության, սպայի, զինվորի լիազորությունների և պարտականությունների մասին:
Անցկացվում է «ՀՀ զինված ուժերը՝ որպես երկրի անվտանգության հիմնական երաշխավորը» ծրագիրը, որն իրականացնում է «Փորձագետ» ռազմավարական հետազոտությունների կենտրոն ՀԿ-ն՝ ՀԵՀ-ի՝ որպես ՀՀ նախագահի գործընկեր կազմակերպության կողմից հայտարարված դրամաշնորհային մրցույթի շրջանակներում։
Ծրագրի նպատակն է բանակ-հասարակություն կապի ամրապնդման միջոցով բարձրացնել հանրային իրազեկվածության և վստահության մակարդակը հայոց ազգային բանակի նկատմամբ:
Ծրագրի համակարգող, քաղ. գիտ. թեկնածու Ալեն Ղևոնդյանը նկատեց, որ այսօր մեր զինվորը հաճախ հոգեբանական առումով պատրաստ չէ զինծառայությանը և երկրի պաշտպանության մասին տեսական գիտելիքներ ունի: Այնուհետև հավելեց. «Այս դասընթացների միջոցով փորձում ենք երիտասարդներին գիտելիքներ տրամադրել այն մասին, թե ինչ է զինծառայությունը, երկրի պաշտպանությունը, զինված ուժերը: Երիտասարդների մոտ բանակի մասին գիտելիքները հաճախ թերթային ու բամբասանքային են, այնպիսի մտայնություն կա, թե բանակը պետք է հանգստյան տուն լինի, իսկ ծառայությունը՝ հաճելի ժամանցի անցկացում: Չպետք է մոռանալ, որ հենց բանակն է երկրի անվտանգության առաջին երաշխավորը, ուստի ծառայությանը պատրաստված պետք է գնալ թե´ հոգեպես, թե´ ֆիզիկապես»:
Երիտասարդներն արդեն դասախոսություններ են լսել « Հայաստան-Ադրբեջան ռազմական հարաբերակցման խնդիրը ԼՂ սահմանային գոտում», « ՀՀ ազգային շահերի հիմնահարցը և հայեցակարգերը» թեմաներով: ՀՀ ՊՆ խոսնակ Արծրուն Հովհաննիսյանը, «ՀՀ զինված ուժերը» թեմայով դասընթաց կարդալով երիտասարդներին, նշեց. «Այսօրվա բանակը երեք կամ տասը տարի առաջվա բանակը չէ: Առաջընթացը մեծ է: Բայց մեր նպատակն է ավելի մեծ ուշադրություն դարձնել կրթական համակարգին:Այսօր մեր գերխնդիրը արժեհամակարգի և դաստիարակության հարցն է»:
Խոսելով ՀՀ կրթական համակարգում գոյություն ունեցող խնդիրների մասին՝ Ալեն Ղևոնդյանը նշեց, թե ՀՀ հանրակրթական դպրոցներում ռազմագիտության դասընթացները հիմնականում երիտասարդներին տեսական գիտելիքներ են փոխանցում: Այնուհետև մտահոգություն հայտնեց այն առումով, որ բուհերում այլևս չեն գործում ռազմական ամբիոնները: Հետո նկատեց. «ԿԳՆ-ն այս տարվանից օրենսդրական փոփոխություններ է կատարել իր օրենսդրական ակտերում, որի արդյունքում բուհ ընդունվող բոլորը երիտասարդները զինապարտ են դառնում, սա կարևոր և անհրաժեշտ փոփոխություն է: Սակայն հարկ է նշել, որ ապագա զինվորը պիտի գիտակցի և հասկանա՝ իրեն ինչ է սպասվում պարտադիր զինծառայության մեջ, ու պատրաստ լինի դրան: Տղաները պիտի հասկանան՝ բանակն ինչ է, զենքն ինչ է, հայրենիքի պաշտպանությունը ինչ է»:
Դասընթացի մասնակից, ԵՊՀ միջազգային հարաբերությունների ֆակուլտետի բակալավրիատ 4-րդ կուրսի ուսանող Հայկ Սարգսյանը, կարևորելով ծրագրին մասնակցությունը, նշեց. «Այսօր ունենք խնդիր նաև ներբանակային, ներզորամասային միջավայրում ապահովելու նորմալ հարաբերություններ: Ցավալի իրողություն է ներզորամասային միջավայրում ոչ կանոնադրական հարաբերությունների արդյունքում տարբեր բախումները: Ուստի այս դասընթացները մեզ գիտելիքներ են ընձեռում հետագայում ավելի գիտակից մոտենալու այդ հարցերին և հասկանալու խնդրի էությունը»:
Տեսական 10 դասընթացներին կհաջորդեն գործնական պարապմունքները: Ուսանողները շուրջ հինգ օր կանցկացնեն ԼՂ զորամասերից մեկում, գործնականում կծանոթանան զորամասի առօրյային, կանցնեն կրակային պատրաստվածության, կանոնադրական հարաբերությունների մասին դասընթացներ, կծանոթանան զինտեխնիկայի հետ:
Հայաստանի երիտասարդական հիմնադրամի
հասարակայնության հետ կապերի ծառայություն
