«Ստիպված եմ մեկ անգամ էլ հաստատել, որ, ցավոք, Հայաստանի Հանրապետությունում դատարանները քրեական գործերով, հատկապես՝ կալանքի հետ կապված հարցերով, ընդունակ չեն կայացնելու արդար դատական ակտեր, և փաստը հաստատում են հնչեղություն ստացած գործերը, որոնց թվում է Վոլոդյա Ավետիսյանի գործը»,- այսօր այս խոսքով սկսեց մամուլի ասուլիսը փաստաբան Արամ Զաքարյանը, որ եկել էր մանրամասներ ներկայացնելու նախօրեին կայացած՝ Վոլոդյա Ավետիսյանի գործով դատական նիստի մասին: Փաստաբանը վրդովված էր. անարդարություն է կատարվում:
Վոլոդյա Ավետիսյանը գտնվում է կալանքի տակ, պարբերաբար պաշտպանական կողմը միջնորդություններ է հարուցում, որպեսզի նրան կալանքից ազատ արձակեն: Դատարանները շարունակաբար այս միջնորդությունները մերժում են՝ բերելով այն պատճառաբանությունը, որ ազատության մեջ մնալու դեպքում Վոլոդյա Ավետիսյանը կարող է խոչընդոտել գործի քննությանը՝ վկաների վրա անօրինական ազդեցություն գործադրելու եղանակով. «Դատական նիստի ընթացքում ես նորից միջնորդություն հարուցեցի պաշտպանյալիս՝ ազատ արձակելու վերաբերյալ: Միջնորդության հիմքում դրեցի այն հանգամանքը, որ բոլոր վկաները հարցաքննվել են դատարանում, չներկայացած անձանց ցուցմունքները հրապարակվել են, այսինքն՝ անգամ տեսականորեն վկաների վրա ազդելու անհրաժեշտությունը վերացած է, հետևաբար դատարանը պարտավոր է այս պայմաններում Վոլոդյա Ավետիսյանին ազատ արձակել: Մեր դատարանն իրեն պահեց այնպես, ինչպես կպահի իրեն արդարադատություն իրականացնելու անընդունակ դատարանը. մերժեց Վոլոդյա Ավետիսյանին կալանքից ազատ արձակելը՝ պատճառաբանելով, որ այս պահին ազատության մեջ գտնվելու դեպքում Վոլոդյա Ավետիսյանը կարող է խուսափել քննությունից: Ո՛չ մի ուրիշ փաստ, ո՛չ մի պատճառաբանություն ու հիմնավորում դատարանը չի նշել: Ակնհայտ է, որ այսպիսի անհիմն փաստեր բերելը հերթական վկայակոչումն է դատավորի՝ ուղղակիորեն շահագրգռվածության մասին. նա ոչ մի ձև չի ցանկանում Վոլոդյա Ավետիսյանին բաց թողնել: Այս խայտառակ որոշումը կայացնելուց հետո դատավորը ցանկանում էր շարունակել նիստը՝ առանց որոշման օրինակներ տրամադրելու պաշտպանական կողմին: Անհրաժեշտություն առաջացավ դատավորին բացարկ հայտարարել: Ես խնդրեցի դատավորին ժամանակ տրամադրել ինձ, բայց մերժվեցի: Ըստ դատավորի, նիստը պետք է շարունակվեր, իսկ պաշտպանը մյուս նիստին հայտներ բացարկը: Տեսնելով, որ այլ ելք չկա, ստիպված եղա հերթական անգամ դատարանի դահլիճը լքել»:
Ի պաշտպանություն Վոլոդյա Ավետիսյանի խմբի համակարգող Գագիկ Սարուխանյանն ավելացրեց. «Իշխանությունները դիտավորյալ Վոլոդյա Ավետիսյանին պահում են անազատության մեջ: Սա վերից վար շինծու գործ է, և այն արդեն դառնում է իրավական տեռոր: Մարդուն իր գաղափարախոսության ու գործունեության համար պատժում են: Պատժում են ոչ միայն իրավական մակարդակով, այլ նաև ՝ հոգեբանական: Վոլոդյայի հիվանդ երեխային տարել են բանակ: Տղայի առողջական վիճակն ավելի է սրվել, սրտի հետ կապված խնդիրներն ավելի ակնհայտ են դարձել: Նա հիմա հոսպիտալում է: Դատավարությունից հետո մենք տղաներով փակեցինք ճանապարհը, որպեսզի թույլ չտանք Վոլոդյային տանող մեքենան դուրս գա տարածքից: Սա ակցիայի բնույթ էր կրում: Մենք ցանկացանք հիշեցնել ռեժիմի, իշխանության ներկայացուցիչներին, որ մենք ենք երկրի տերը. մի՛ հասցրեք մեզ անելու այն, ինչ մենք չենք ուզում անել: Վերադարձեք իրավական դաշտ»:
Երկուշաբթի կայանալիք հաջորդ նիստի ժամանակ պարոն Զաքարյանը պատրաստվում է ինքնաբացարկ հայտնել դատավորին. «Չեմ ակնկալում, որ այս անգամ դատավորը արդար որոշում կկայացնի: Ես զուգահեռ դիմել եմ նաև Արդարադատության խորհուրդ, որպեսզի տվյալ դատավորին պատասխանատվության ենթարկեն և լիազորությունները դադարեցվեն»:
Կարդացեք նաև
Սյունե Սևադա
