«Իմ եղբայրը զբաղվում է գործարարությամբ, գնամ ստուգեմ նաև իրեն` հարկերը վճարո՞ւմ է, թափանցիկ ներկայացնեմ: Եթե վարչապետինը չանենք, ինչո՞ւ չանենք»,- ՀՀԿ 15-րդ համագումարի մեկնարկից առաջ, լրագրողների հետ ճեպազրույցում ասաց Հովիկ Աբրահամյանը`պարզաբանելով, որ երբ հայտարարել է, որ բիզնես դաշտը ստվերից դուրս բերելու համար սկսելու է իր իսկ մերձավորներից, իր հարազատ եղբորն էլ է նկատի ունեցել:
Հովիկ Աբրահամյանը վստահեցրեց, որ միշտ էլ ուշադիր է եղել, պարզապես այժմ առավել ուշադիր ու պահանջկոտ է լինելու. «Որևէ նախարար իրավունք չունի գործարարությամբ զբաղվել: Ինչի՞ մասին է խոսքը»: Սա, իհարկե, չի նշանակում, որ նախարարներն իրենց բիզնեսը չեն կարող ազգականների անունով գրանցել: Համենայնդեպս, լրագրողներից մեկի հարցին`իսկ նրանց բարեկամները բիզնես ունենալու իրավունք ունե՞ն, վարչապետը պատասխանեց. «Ինչո՞ւ չունենան, պետք է տարանջատել` եթե մարդու բարեկամը զբաղվում է բիզնեսով, պետք է դա բարեկամի միջոցով չլինի: Օրինակ՝ ես դատապարտում եմ այն պաշտոնյային, ում որդին, ում բարեկամը, ում եղբայրը զբաղվում է բիզնեսով ու հարկային դաշտում չի հայտնաբերվում, դա է խնդիրը: Դրա համար հանձնարարել եմ հատուկ ուշադրություն դարձնել այն բոլոր նախարարներին, պաշտոնյաների բարեկամներին, ովքեր զբաղվում են բիզնեսով, հետաքրքրվել` հարկերը վճարում են, թե՝ ոչ»:
Վարչապետն ասաց, որ գործարարների հանդիպման ժամանակ ինքը չի ասել, որ գոնե ստվերի 90%–ը հարկային դաշտ պետք է բերվի. «Նման հայտարարություն չի, դա խառնաշփոթ ստեղծելու միտում է»։
Լրագրողներից մեկը հետաքրքրվեց, իսկ եղել է նման խոսակցություն, որ գործարարներից մեկն ասել է, եթե մյուսները գան, ապա ինքն էլ պատրաստ է «դուրս գալ ստվերից», Հովիկ Աբրահամյանը պատասխանեց. «Այո՛ , դա Սամվել Ալեքսանյանն է ասել, ես գնահատում եմ իր անկեղծությունը, և նա ասաց, որ եթե աշխատում են հարկային դաշտում, ես պատրաստ եմ ինքս դառնալ օրինակ»։ Հարցին, դա կարելի՞ է ընդունել խոստովանություն այն մասին, որ մինչ այսօր Ալեքսանյանի բիզնեսը ստվերում է եղել, վարչապետը պատասխանեց. «Մինչև այսօրի մասին ես չեմ խոսում, խոսում ենք պայմանավորվածությունների մասին»։
Կարդացեք նաև
Հովիկ Աբրահամյանը հերքեց, որ կառավարության ծրագրի քննարկման ժամանակ ՀՀԿ պատգամավորների միմյանց փոխարեն են քվեարկել ու մեղադրանքի սլաքն ուղղեց ընդդիմադիրներ կողմը`ասելով, որ ընդդիմադիրները տեղում պետք է պահանջեին քվեարկության պատկերը: Այնուհանդերձ, վարչապետը ասաց, որ դրական չի վերաբերվում միմյանց փոխարեն քվեարկելու երեւույթին. «Դա վատ բան է, անհրաժեշտությունն էլ չկար, ես քննադատում եմ այն բոլոր պատգամավորներին, ովքեր քվեարկել են ոչ իրենց փոխարեն»:
Նելլի ԳՐԻԳՈՐՅԱՆ
ՎԱՅ շատ ապրի Սամվել Ալեքսանյանը.. Բա էս ուր էր 20 տարի????????????