«Մենք չենք բոյկոտել կառավարության ծրագրի քվեարկությունը, այլ միայն չենք մասնակցել դրան»-այսօր «Մեդիա կենտրոնում» «ՀՀ նոր կառավարության ծրագիրը. լուծումնե՞ր, թե՞ ցանկություններ» թեմայով քննարկման ժամանակ հայտարարեց ԲՀԿ խմբակցության պատգամավոր Միքայել Մելքումյանը: Նա նաև նշեց, թե չեն խանգարի նոր կառավարությանը՝ մարդկանց կյանքը բարելավելուն ուղղված գործողություններ իրականացնել:
ՀԱԿ խմբակցության պատգամավոր Լյուդմիլա Սարգսյանի կարծիքով` անձերի փոփոխությունից ոչինչ չի փոխվում, կառավարության մղումներն ու տրամաբանությունը նույնն են ու շեշտեց. «Մենք չենք վստահում ոչ ծրագրին, ոչ նոր կառավարությանը»:
ԱԺ «Ժառանգություն» խմբակցության քարտուղար Թևան Պողոսյանը նշեց, թե իրենք չեն քննարկել կառավարության ծրագիրը բովանդակային առումով, քանի որ չեն ընդունում միայն մարդկանց փոփոխությունը:
ՕԵԿ խմբակցության պատգամավոր Հովհաննես Մարգարյանը մտահոգություն հայտնեց. «Ի տարբերություն նախորդ կառավարության ծրագրի՝ այս մեկում արտացոլված չէ, թե ինչպես է լուծվելու մեր ժողովրդին հուզող հիմնական խնդիրը՝ գործազրկությունը»:
Ի պատասխան հնչած քննադատությունների` ՀՀԿ խմբակցության քարտուղար Հովհաննես Սահակյանը նշեց. «Կառավարության ծրագիրը չի կարող հիմնված լինել երազանքների վրա, ծրագիրը հիմնվել է իրատեսության վրա»: Դառնալով ՀՀԿ-ի վարած քաղաքականությանը` նշեց. «ՀՀԿ-ն միշտ իր վրա դրված բեռը վերցնում ու գնում է առաջ»: Պատասխանելով Հովհաննես Մարգարյանին նա կարծիք հայտնեց. «Խնդիրն այլ հարթության մեջ է: Ենթադրենք ծրագրում գրենք այսքան կամ այնքան աշխատատեղեր ենք ստեղծում: Բայց հեռու եմ այն մտքից, որ այդ դեպքում ՕԵԿ-ի մեր գործընկերները կողմ էին քվեարկելու կառավարության ծրագրին»: Այնուհետև վրդովվեց. «Կարծես քառյակն էլ մրցակցության մեջ է մտել, թե ով ավելի շատ կարող է դատափետել ՀՀԿ-ին, կառավարությանը` մոռանալով իրենց կողքի մարդկանց բոլոր մեղքերը»:
Կարդացեք նաև
Տաթև ՀԱՐՈՒԹՅՈՒՆՅԱՆ
