-Տիկին Նաղդալյան երկու օր շարունակ ԱԺ-ում բավական ակտիվ ընթացան կառավարության ծրագրի քննարկումները, 34 պատգամավոր հարցեր ուղղեցին վարչապետ Հովիկ Աբրահամյանին, ինչն աննախադեպ էր. Ձեր հետևությունները քննարկման ընթացքից և դահլիճում տիրող մթնոլորտից.
-Նախ կուզեի ընդգծել վարչապետի հանդուրժողական կեցվածքը բոլոր այդ հարցերին պատասխանելիս՝ առանց մեծամտության, ամբիցիաների և ինքնասիրահարվածության, համախմբման և հանդուրժողականության ճանապարհով ընթանալու, բոլոր կարծիքները, խորհուրդները և քննադատությունները լսելու և հաշվի առնելու պատրաստակամությամբ՝ պատասխանեց իրեն ուղղված բոլոր հարցերին: Բազմաթիվ մարդկանց հետ նախկինում և ներկայումս շփումների արդյունքում՝ կարող եմ ասել, որ վարչապետի այդ ոճը` պարզ և մարդկային լեզվով, շիտակ ու մատչելի բոլորի համար, միշտ ընդունելի է եղել լայն հանրության կողմից: Իրականում Հ. Աբրահամյանը իր պատասխանների մեջ անսահման հանդուրժող էր, կարողացավ զսպվածություն և հավասարակշռություն ցուցաբերել, չտրվել սադրանքներին, անգամ տհաճ հարցերին, սուր և սրելու նպատակադրությամբ հնչեցրած հարցադրումներին պատասխանեց օբյեկտիվ և բարյացակամ՝ վարպետորեն առանձնացնելով իսկապես սրտացավությամբ թելադրված և երկրի առաջընթացի համար կարևոր խնդիրները, որ հնչեցնում էին մեր գործընկերները երկուստեք՝ ինչպես իշխանական, այնպես էլ ընդդիմադիր խմբակցությունների պատգամավորները, պարզապես քննադատելու, սևացնելու և հատկապես իրավիճակը սրելու մտադրություններից, նույն սադրիչ հարցը այս կամ այն առավել վիրավորական խմբագրությամբ անվերջ կրկնելուց կամ առանձին անձանց անունները ավելի ու ավելի բարձրաձայն հնչեցնելու «հերոսական» կեցվածքից դրդված: Պարզ դարձավ, որ մեր որոշ ընդդիմադիր գործընկերների համար, իսկապես, խնդիրը ո’չ կառավարության կազմի, և ո’չ էլ ծրագրի բովանդակության մեջ է, այլ հենց այդ տխրահռչակ` «ինչքան վատ, այնքան լավ» սկզբունքը որոշ քաղաքական ուժերի կողմից դավանելու և կառուցողական դաշտում աշխատելու նպատակադրում չունենալու մեջ է: Քաղաքական թշնամանքը ոչ մի տեղ չտանող ուղի է: Կցանկանայի, որ, ի տարբերություն այդ թշնամանքի, ոչ մի լավ բան չտեսնելու, միայն սևացնելու մոտեցման` մեր քաղաքական դաշտում գերիշխեր մեր ամենափորձառու քաղաքական ուժերից մեկի մոտեցումը, որը բարձրաձայնվեց հետևյալ կերպ` «մենք ուրախ կլինենք, եթե կառավարությունը հաջողի, բայց մեր գնահատականը արդյունքներով է պայմանավորված լինելու»:
Սա՛ է կառուցողական համագործակցության և միասնական ճանապարհով խնդիրներին լուծում տալու ուղին:
Աննա ՎԱՐԴԱՆՅԱՆ
Քաղաքական թշնամանքը ոչ մի տեղ չտանող ուղի է. – Հարգելի տիկինը կամ չի գիտակցում, (կամ ձեւ է անում որ չի հասկանում) որ «քաղաքական» կոչվողն իրականում արտացոլում է սոցիալական եւ իրավական անհավասարության ահավոր անդունդը, որ իրենք են ստեղծել՝ իրենց ագահության ու փառասիրության զոհը դարձնելով ժողովրդին ու երկրի ապագան: Երեսպաշտությամբ ու դեմագոգիկ կոչերով դրությունը չի փրկվի: ԿԱՄ ԴՈՒՔ ՊԻՏԻ ՉՔՎԵՔ, ՎԵՐԱՆԱՔ, ԵՐԿՐԻՆ ՀՆԱՐԱՎՈՐՈՒԹՅՈՒՆ ԸՆՁԸՌՆԵԼՈՎ ՈՏՔԻ ԿԱՆԳՆԵԼՈՒ, ԿԱՄ ՊԻՏԻ ԿՈՐԾԱՆՎԵՔ ԲՈԼՈՐԻ ՀԵՏ ՄԻԱՍԻՆ: