Տիգրան Սարգսյանհ անվան հետ կապված հայտնի օֆշորային սկանդալում ներգրավված գործարար Աշոտ Սուքիասյանի արտահանձնումը ձգձգվում է։
Վրաստանում կալանքի տակ գտնվող Սուքիասյանը դեռ մեկ ամիս առաջ միջնորդել էր Թբիլիսիի կենտրոնական դատարանին իրեն շտապ տեղափոխել Հայաստան՝ նշելով, որ այս ընթացքում մահացել են նրա ծնողները, իսկ կնոջը ահաբեկող ու սպառնալիքներով լի հաղորդագրություններ են ուղարկում։ Դատարանը բավարարել էր Սուքիասյանի միջնորդությունը եւ արտահանձնման մասին վճիռը պաշտոնապես մտել էր ուժի մեջ, սակայն մինչ օրս հայտնի չէ նրա արտահանձման օրը։
ՀՀ գլխավոր դատախազությունը նշում է, որ տեխնիկական խնդիր է Աշոտ Սուքիասյանին Հայաստան արտահանձնելու հարցը։ Պարզվում է՝ գործարարի արտահանձնման ձգձգման պատճառն այս անգամ Վրաստանի արդարադատության նախարար Թեա Ծուլուկիանին է, ով եւ պետք է ստորագրի արտահանձնման վերաբերյալ որոշումը, ինչից հետո միայն հնարավոր կլինի կազմակերպել այդ գործընթացը։ Սակայն, ինչպես երեւում է, նա չի շտապում ստորագրել այն։
ՀՀ գլխավոր դատախազության աշխատակազմի հանրային կապերի վարչության պետ Շահեն Տոնոյանը ասաց, որ վրացական կողմը պետք է որոշի՝ երբ արտահանձնել Սուքիասյանին. Վրաստանի արդարադատության նախարարը դեռ չի ստորագրել արտահանձման վերաբերյալ որոշումը, ստորագրելուց հետո նոր կկազմակերպվի արտահանձնումը։
Կարդացեք նաև
Հարցին, թե կա՞ն հստակ ժամկետներ արտահանձնման գործընթացի վերաբերյալ, Շահեն Տոնոյանը նշեց, որ չի կարող ասել։
Նա նաեւ նշեց, որ, երբ Աշոտ Սուքիասյանին արտահանձնեն Հայաստան, նախաքննական մարմինը պետք է միջնորդություն ներկայացնի դատարան, նրա խափանման միջոց կալանավորման վերաբերյալ։
Վրաստանի արդարադատության նախարարի մամլո խոսնակ Մարիան Մսխիլաձեն երկու շաբաթ առաջ՝ մայիսի 5-ին, «Հետքի» հետ զրույցում հայտնել է, որ նախարարը դեռ ժամանակ ունի, եւ դեռ չի լրացել այն ժամկետը, որի ընթացքում նա պետք է ստորագրի Աշոտ Սուքիասյանի արտահանձման որոշումը։
Տաթեւ ԽԱՉԱՏՐՅԱՆ
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում
