shamshyan.com. Կոտայքի մարզի Նոր Գեղի գյուղում ապրող 7 հոգանոց ընտանիքը բարեգութ և սրտացավ մարդկանց օգնության կարիքն ունի: Հայկը, ով նոյեմբերին կդառնա 7 տարեկան, ծնված օրից աղիքային անանցանելիության խնդիր ունի, հենց դրա պատճառով գրեթե միշտ որովայնը ցավում է:
Նոր Գեղիում ապրող բազմանդամ ընտանիքը 6 ամսականից բոլոր հնարավոր միջոցներով պայքարում է Հայկի առողջացման համար: Սկզբում նրան Սուրբ Աստվածամայր հիվանդանոց են տարել, հետո արդեն՝ «Արաբկիր» բժշկական կենտրոն: Հենց 6 ամսականում երեխային առաջին անգամ վիրահատել են:
Եղբոր խոսքով՝ Հայկը այս տարիների ընթացքում մի քանի վիրահատություններ է տարել, հիմնականում՝ «Արաբկիր» բժշկական կենտրոնում: Հարազատները չգիտեն՝ ինչպես շնորհակալություն հայտնեն այդ բժշկական կենտրոնի անձնակազմին: Ասում են՝ բոլոր հնարավոր և անհնարին տարբերակներով օգնել են երեխային, սակայն նրա խնամքը բավականին մեծ գումարների հետ է կապված, քանի որ Հայկի օրգանիզմը չի ընդունում ուրիշ դեղեր:
Մայրը՝ Լուսինեն, ասում է՝ նոյեմբերին արտերկրից բժիշկ պետք է գա Հայաստան, սակայն վստահ չեն, որ այդ վիրահատությունը կօգնի երեխային: Բոլոր վիրահատություններից ու երկար բուժումից հետո և ընտանիքի անդամները, և բժիշկները եկել են այն եզրահանգմանը, որ Հայկը լիարժեք պետք է բուժվի Գերմանիայում, սակայն ընտանիքը դրա համար հնարավորություններ չունի: Տանն աշխատում է միայն ավագ երեխան, մայրն ի վիճակի չէ աշխատելու, իսկ միջոցները չեն բավականացնում:
Կարդացեք նաև
Ընտանիքը դիմում է բոլոր բարի մարդկանց, որպեսզի օգնեն և փոքրիկ Հայկին տեղափոխեն Գերմանիա, որտեղ էլ երեխան կստանան լիարժեք ու վերջնական բուժում:
