Այսօր Գյումրու «Ֆոտոն» վարժարանում գերժամանակակից ինովացիոն տեխնոլոգիաներով հագեցած դասարան բացելիս, լրագրողները ՀՀ կրթության և գիտության նախարար Արմեն Աշոտյանից հետաքրքրվեցին, թե քանի՞ տոկոսով կբարձրանա մանկավարժների աշխատավարձը: «2014 թվականի պետական բյուջեի դրած թվերը ես կարող հիմա բարձրաձայնել, մոտավորապես 8-10 տոկոսով կբարձրանա մանկավարժների աշխատավարձը: Իհարկե, մենք պետք է այս ընթացքում հասկանանք նաև այն թիվը, որը կա Շիրակի մարզում, մենք հիմա ավելի շատ մանկավարժ ունենք դպրոցներում աշխատող, քան աշխակերտ, խոսքը հարաբերակցության մասին է»,- ասաց նախարարը: Նա նշեց, որ այս խնդրի լուծման երկու տարբերակներն էլ վատն են` եթե զանգվածային կրճատումներ անեն, դա սոցիալական խնդիրը կխորացնի, իսկ եթե թույլ տան, որ ուսուցիչների մեծ մասը թերծանրաբեռնվածությամբ աշխատեն, սրանով կգցեն կրթության որակը: Ըստ նախարարի, ինքը չի ուզում դպրոցը մանկավարժի համար լինի տնից դուրս գալու առիթ:
Այս հարցին պատասխանելու հետ մեկտեղ նախարարը ձեռքի հետ մի քանի դասեր տվեց լրագրողներին: «Սիրելի լրագրողներ, դուք մեծ հաճույքով կարող եք տարածել ինչ-որ մի ուսուցչուհու անուն, որը սխալ է վարվել կամ մի տնօրենի անուն, որը կաշառք է վերցրել, բայց հազարավոր ուսուցիչներ, մանկավարժներ որոնք ամեն օր աշխատում են, իրենց անունները չեք ուզում տարածել: Երբ որ մի կրթական այսպես ասած արտակարգ իրավիճակ է լինում, ենթադրենք ինչ-որ մեկը բռնվել է ինչ-որ վատ արարքի վրա, գրեք այդ ամենը, մի կոծկեք, ընդհակառակը օգնում եք մեզ` նման դեպքերում` դառնալով մեր դաշնակիցը, բայց կողքից, որպեսզի չստացվի, որ մանկավարժները վատն են, դպրոցները վատն են, փորձեք այդ օրը գոնե երկու ուսուցչի մասին դրական ռեպորտաժ գրեք: Լավ դեպքերը ստվերվում են, մտածում ենք այդպես էլ պետք է լինի, բայց հանկարծ ինչ-որ մեկը ինչ-որ մի տեղ ինչ-որ մի պրոբլեմ է տալիս, դարձնում ենք մատի փաթաթան, լրահոսի թոփ թեմա: Ինչի՞ ենք հասնում, կրթության մասի՞ն ենք մտածում, խնդրում եմ գովաբանեք լուսաբանեք լավը, լավ մանկավարժներին, ինձ չէ, ես քաղաքական գործիչ եմ», -ասաց նախարարը:
Արմեն Աշոտյանի ամբողջական խոսքը` տեսանյութում
Կարդացեք նաև
Նունե ԱՐԵՎՇԱՏՅԱՆ
