«Պետք չէ ողբերգություն սարքել կապված քաղաքական այդ զարգացումների համար: Այդ դիվանագետը համարժեք պատասխան ստացել է: Քաղաքական զարգացումների, մեր քվեարկությունների, դիրքորոշումների, տեսակետների հետ կապված դիվանագետները շատ դեպքերում կարծիքներ են հայտնում, որոնք մեզ բացարձակ դուր չեն գալիս»,-անդրադառնալով ԵԱՀԿ Մինսկի խմբի ամերիկացի համանախագահի «օկուպացված տարածքները» հանձնելու վերաբերյալ հայտարարություններին, այսպիսի կարծիք հայտնեց ԱԺ ՀՀԿ խմբակցության պատգամավոր Կարինե Աճեմյանը: Պատգամավորի կարծիքով`«կարող է և ամերիկացին հայտնել տեսակետ քաղաքական զարգացումների վերաբերյալ, ինչը համարժեք պատասխան ստացել է»:
ՀՀՇ վարչության անդամ Հովհաննես Իգիթյանը մի քանի շեշտադրումներ արեց. «Ուորլիքը ամերիկացի չէ, իր ելույթի ժամանակ առաջին նախադասությունը այն էր, որ այստեղ ինքը չի ներկայացնում Մինսկի խմբի համանախագահի կարծիքը, այլ պաշտպանում է Վաշինգտոնի կարծիքը: Սա նշանակում է, որ Մինսկի խմբի մեջ կա համանախագահների մի կողմ, որը փորձում է արագացնել կամ իր վրա վերցնել Ղարաբաղյան հակամարտության լուծումը: Սա խոսում է այն մասին, որ ԱՄՆ-ն իրոք տրամադրված է լուծել ղարաբաղյան հիմնախնդիրը»:
Պաշտոնական Երևանի արձագանքի մասին պարոն Իգիթյանն այսպիսի կարծիք հայտնեց. «ԱԳՆ-ն միայն մեղադրանքներ է հնչեցրել Ադրբեջանի հասցեին: Բայց ամենակարևորը, որ պետք է ԱԳՆ-ն ասեր, դա այն էր, թե ՀՀ-ն ինչ բանաձև է տեսնում ԼՂՀ հարցի կարգավորման պարագայում: Նույն կերպ կարճ, ինչպես Ուորլիքն ասաց»:
Կարինե Աճեմյանը հակադարձեց` «Դա անընդհատ ասվել է: Սա այն հարցը չէ, որ շատ արագ կլուծվի»:
Հովհաննես Իգիթյանն էլ` թե «ի՞նչն է խանգարում Էդվարդ Նալբանդյանին դա ասել, նա մեզնից ավելի լավ դիվանագետ է»: Կարինե Աճեմյանը պատասխանեց` «Հենց դիվանագետ լինելը»:
Կարդացեք նաև
Հովհաննես Իգիթյանի համար անընդունելի են «Հայաստանի անշահախնդիր քծնանքները Ռուսաստանին»: Այս առիթով պարոն Իգիթյանն ամփոփեց. «Մենք չպետք է լինենք մի մարմնում, որը պետք է խզի ՀՀ և ԼՂՀ տնտեսական հարաբերությունները»:
Տաթև ՀԱՐՈՒԹՅՈՒՆՅԱՆ
