Թիվ 1 հիվանդանոցի Ինտենսիվ թերապիայի եւ վերակենդանացման բաժանմունքի վարիչ Արթուր Առաքելյանը վստահեցնում է, որ նախօրեին «Վերնիսաժի» մոտ տեղի ունեցած կրակոցների արդյունքում իրենց հիվանդանոց տեղափոխված տուժածների վիճակը կայուն է:
Նրա խոսքով, հինգ վիրավորներից չորսին վիրահատել են: Հինգից երեքի վիճակը գնահատվում է ծանր կայուն, երկուսինը՝ բավարար:
Պարոն Առաքելյանի խոսքով, կայուն վիճակում են 74 տարեկան Ալվինա Բադալյանը, որի ձախ սրունքն էր հրազենային վնասվածք, կոտրվածք ստացել, Նորայր Հարությունյանը, որի ձախ ազդրը մի քանի տեղից էր հրազենային վնասվածք ստացել:
Ծանր, բայց կայուն վիճակում են 72 տարեկան Մնացական Սուքիասյանը, որը սրունքի ոսկրերի, զարկերակի վնասվածքներով էր հիվանդանոց տեղափոխվել: 27- ամյա Մյասնիկ Հայրապետյանն էլ է ծանր վիճակում, որը, ամենայն հավանականությամբ, հենց վեճի բռնվողներից մեկն է եղել. նա ձախ ազդրի ու նույն կողմից անոթի վնասվածք էր ստացել: Ծանր, կայուն վիճակում է նաեւ ներքին օրգաններին հրազենային վնասվածքներ ստացած 30- ամյա Վալերի Հովհաննիսյանը:
Կարդացեք նաև
Մեր հարցին՝ տուժածներն արդեն հարցաքննվե՞լ են, նա հրաժարվեց պատասխանել:
ՀՀ ոստիկանության քննչական գլխավոր վարչության պետի տեղակալ Թաթուլ Պետրոսյանը Aravot.am-ին հայտնեց, որ տուժածներից երկուսը, որոնք ծանր վիճակում են, դեռ չեն հարցաքննվել: Մյուս երեքին արդեն հարցաքննել են: Հարուցվել է քրեական գործ՝ 235 հոդվածով:
Ինչպես ավելի վաղ ոստիկանությունը տեղեկացրել էր, կրակոցներ արձակած և 5 քաղաքացիների վիրավորած անձը ձերբակալվել է, առգրավվել է զենքը: Հարցաքննության եւ դեպքի այլ մանրամասներ պարոն Պետրոսյանը չցանկացավ ներկայացնել՝ ելնելով նախաքննության շահերից:
Արփինե ՍԻՄՈՆՅԱՆ
