Ռուսաստանի նախագահ Վլադիմիր Պուտինը պաշտպանության նախարար Սերգեյ Շոյգուին կարգադրել է մշտական տեղակայման վայր բերել Ուկրաինայի սահմանի մոտ զորավարժություններին մասնակցող զորքերին, հաղորդում է ռուսական «Ինտերֆաքս»-ը՝ հղում անելով Կրեմլի մամուլի ծառայությանը:
«Զինվորներն ու սպաները, որոնք Ռոստովի, Բելգորոդի և Բրյանսկի երկրամասերի հրաձգարաններում զորահանդեսներ էին անցկացնում, կապված մարտական պատրաստվածության գարնանային փուլի ավարտի հետ, կշարունակեն մարտական դասերը իրենց մշտական տեղակայման մոտակա հրաձգարաններում», – հայտնել են Կրեմլից:
Ռուսական զորքի՝ Ուկրաինայի սահմանի մոտ գտնվելու հարցը կրկին բարձրացվել էր Պուտինի և ԵԱՀԿ նախագահ Դիդիե Բուրկհալթերի մայիսի 7-ի հանդիպմանը: Այդ ժամանակ ՌԴ նախագահն ասել էր, որ Ռուսաստանը Ուկրաինայի սահմանի մոտից հետ է բերել իր զորքերը:
Նույն օրը ՆԱՏՕ-ի քարտուղար Անդերս Ֆոգ Ռասմուսենը հայտնել էր, որ իրենք ռուսական զորքերը հետ քաշելու մասին ոչ մի տվյալ չունեն:
Կարդացեք նաև
Մայիսի 12-ին ԱՄՆ պետդեպարտամենտը Թվիթերում արբանյակից արված լուսանկարներ էր հրապարակել, որոնք ցույց էին տալիս, որ զորքերը դեռևս գտնվում են Ուկրաինայի սահմանի մոտ:
Պատրաստեց Հովհաննես ԻՇԽԱՆՅԱՆԸ
