Այսօր ԱԺ-ում ԿԲ նախագահ Արթուր Ջավադյանը շնորհակալություն հայտնեց ՀՀ նախագահին ԿԲ նախագահի պաշտոնում իրեն վերանշանակելու համար, հետո պատասխանեց պատգամավորների հարցերին:
ԲՀԿ խմբակցության պատգամավոր Միքայել Մելքումյանը դժգոհեց, որ ԿԲ-ն լավ կանխատեսումներ չի անում՝ տնտեսական աճի հետ կապված, գնաճի հետ կապված:
Արթուր Ջավադյանն ասաց, որ թիմը ուժեղացրել են. «Ես նշել էի, որ էներգակիրների բարձրացումը բերելու է 2 տոկոս ուղղակի ազդեցություն գնաճի վրա եւ 1 տոկոս՝ անուղղակի»: Նա նշեց, որ փոխարենը՝ ծառայությունների գնանկում ունեն. «Ինտերնետի գները չեք կարող համեմատել 5 տարի առաջվա հետ»:
Միքայել Մելքումյանի դիտարկմանը որ վարկերի տոկոսադրույքները բարձր են, երբ վարկ եք տալիս, չի խթանում բիզնեսը՝ ԿԲ նախագահը պատասխանեց. «Ծավալուն աշխատանքներ են արվում: Իհարկե, բանկերն իրենց թշնամիները չեն»:
Միքայել Մելքումյանն անդրադարձավ նաեւ փոխարժեքի տատանումներին եւ ԿԲ նախագահից պարզաբանում պահանջեց. «2009-ի մարտի 2-3-ին փոխարժեքի կուրսի կտրուկ բարձրացում եղավ: Ասում եք դրամով պահենք մեր խնայողությունները: Դա անհնար է, եթե այդպիսի ռիսկեր կան: Դուք ասել եք, որ կան ոչ ստանդարտ խաղի կանոններ»:
Կարդացեք նաև
Արթուր Ջավադյանը պատասխանեց. «2009-ի մարտի 2-ից առաջ էլ մի շարք միջոցառումներ իրականացվեցին, մենք փորձեցինք բավարարել բոլոր թափանցիկ հաշիվ ունեցող հաճախորդներին, տնտեսվարողներին: Մենք այդտեղ պիոներ չէինք, առաջին անգամ չեղավ: ՌԴ-ն այլ ճանապարհով գնաց՝ 3 ամսվա ընթացքում արժեզրկեց իր ազգային արժույթը: Միջազգային կառույցները մեր արածը գնահատել են բարձր՝ լավագույններից մեկը: Արվել է ամեն ինչ, որ որեւէ մեկը խնդիր չունենա»:
«Ժառանգություն» խմբակցության պատգամավոր Թեւան Պողոսյանը հարցրեց՝ ի՞նչ քայլեր եք անելու, որպեսզի ՀՀ-ում ստեղծեք մի միջավայր, որը թույլ կտա երկար փողեր ապահովել: Արթուր Ջավադյանն ասաց, որ երկար փողերի համար կենսաթոշակային ռեֆորմներն են կարեւոր:
Թեւան Պողոսյանը նաեւ հետաքրքրվեց՝ «Դուք ներկա էիք պարտադիր աուդիտի հանման խնդրի քննարկմանը, ասել եք, որ ՀՀ-ում կան բանկեր, որոնք պատրաստ են ներդնել շուկայում, բայց ասում են, որ բարեխիղճ բիզնես կամ ոլորտ չկա, որ ներդնեն: Հիմա որ աուդիտը հանեն՝ կնպաստե՞ն բարեխիղճ բիզնես ստեղծելուն» : Ըստ ԿԲ նախագահի՝ «Պարտադիր աուդիտին ես ինքս կողմնակից եմ եղել մշտապես: Ճիշտ չի, որ ձեռնարկությունները խուսափում են հաշվետու լինելուց»:
Հռիփսիմե ՋԵԲԵՋՅԱՆ
