Կոտայքի մարզի ընդհանուր իրավասության դատարան է դիմել ՀՀ գյուղատնտեսության նախարարության «Գյուղատնտեսական ծրագրերի իրականացման գրասենյակ» պետական հիմնարկը, որը լիազորել է Հայկազ Կարապետյանին՝ դերասան Վարդան Պետրոսյանի դեմ հարուցված քրեական գործով հանդես գալու որպես քաղհայցվոր:
Վերջինը դատարան է ներկայացրել հանցագործության հետեւանքով պետությանը պատճառված վնասը վերականգնելու պահանջի մասին հայցադիմում:
«Առավոտին» Հայկազ Կարապետյանը հայտնեց, որ հայցադիմումի համաձայն, անցյալ տարվա հոկտեմբերի 20-ի երեկոյան, Եղվարդից Երեւան տանող ճանապարհի Աշտարակի խաչմերուկի հատվածում, Վարդան Պետրոսյանն իր ավտոմեքենայով հարվածել է ճամփեզրից դուրս կայանված, «Գյուղատնտեսական ծրագրերի իրականացման գրասենյակ» պետական հիմնարկին պատկանող, «Վազ» 21 214-126-20 մակնիշի 870 0L 64 պետհամարանիշով ավտոմեքենային: Ի դեպ, վարորդը այս գործով տուժող ճանաչված Արթուր Հակոբյանն է:
Վարդան Պետրոսյանից գյուղնախարարության վերոնշյալ հիմնարկը պահանջում է երկու միլիոն վեց հարյուր հազար դրամ գումար:
Դատարանին կողմը պահանջել էր ճանաչել քաղհայցվոր, ինչը դատարանը բավարարել է:
Հայկազ Կարապետյանը մասնակցում է գրեթե բոլոր դատական նիստերին:
Կարդացեք նաև
ՌՈՒԶԱՆ ՄԻՆԱՍՅԱՆ
«Առավոտ» օրաթերթ
