Aravot.am –ի տեղեկություններով, այսօր անսպասելի Գյումրի է այցելել ՀՀ առողջապահության նորանշանակ նախարար Արմեն Մուրադյանը: Առաջին անգամ Գյումրի այցելած երիտասարդ նախարարն իր հետ հսկայական մի շքախումբ է բերել, որի կազմում եղել են փոխնախարարներ, ԾԻԳ-ի ղեկավարներ, նրանց մեջ եղել է նաև հանրապետության գլխավոր մանկաբարձ-գինեկոլոգը: Նախարարի այցը եղել է ճանաչողական, վերջինս շրջել է Շիրակի մարզի մի քանի առողջապահական հիմնարկներում, մասնավորապես հյուրընկալվել է Գյումրու բժշկական կենտրոնում, այնուհետ եղել է Ավստրիական մանկական հիվանդանոցում, Սամարիթեր հիվանդանոցում, հասցրել է այցելել նաև Ախուրյանի «Մոր ու մանկան» կենտրոն:
Նախարարը տեղում ծանոթացել է խնդիրներին, խորհրդակցություն է անցկացրել և փորձել է հասկանալ, թե ինչով կարող է օգնել մարզին: Մի խոսքով, Արմեն Մուրադյանը բավական երկար ժամանակ գտնվել է Գյումրիում, սակայն չգիտես ինչու նա իր այցը լրատվամիջոցներից գաղտնի է պահել: Ի դեպ, նախարարին ուղեկցել է նաև ՀՀԿ-ական պատգամավոր Սուքիաս Ավետիսյանը, որը օգնել է Արմեն Մուրադյանին ճիշտ պատկերացում կազմել տեղի մարդկանց ու խնդիրների մասին:
Նունե ԱՐԵՎՇԱՏՅԱՆ
