«Ես այսուհետ կաշխատեմ մաքսիմալ իմ ներկայությունն ապահովել, բայց այսօր փոխնախարարները կներկայացնեն քննարկվող հարցերը, քանի որ ես դեռ չեմ հասցրել դրանց լավ ծանոթանալ»,- այսօր ՀՀ ԱԺ պետաիրավական հարցերի մշտական հանձնաժողովի նիստին նման դիտարկմամբ հանդես եկավ ՀՀ արդարադատության նորանշանակ նախարար Հովհաննես Մանուկյանը: Ի դեպ, սա նաեւ առաջին նիստն էր, որը վարում էր հանձնաժողովի նոր նախագահ Հովհաննես Սահակյանը: Փոխադարձ շնորհավորանքներից հետո պատգամավորներն անցան օրակարգին:
Քննարկվում էին «Քաղաքացիական դատավարության օրենսգրքում» եւ «Վարչական դատավարության օրենսգրքերում» լրացումներ կատարելու մասին կառավարության ներկայացրած նախագծերը: Դրանք քննարկվել էին մեկ տարի առաջ եւ հետաձգվել`մեկ տարով: Այդ ընթացքում նաեւ տեխնիկական խնդիրներ են առաջացել, որոնք ևս պետք է շտկվեն: Նախագծերը ենթադրում են խմբային հայցի ինստիտուտի ներդրման եւ կիրառման հետ կապված մանրամասներ:
ՀԱԿ պատգամավոր Գագիկ Ջհանգիրյանը դիտողություն արեց, որ գուցե ճիշտ կլիներ այս հարցերին անդրադառնալ ավելի ուշ`«նոր կառավարություն ա, նոր քաղաքականություն. լավ բան ա, բայց…»: Նախագիծն արդեն իսկ մեկ տարով հետաձգվել է եւ հետաձգելու այլ ժամկետ չկար, հետեւաբար, հանձնաժողովի նախագահ Հովհաննես Սահակյանն առաջարկեց հարցը ներառել մեծ օրակարգ`չներառելով փոքր`հերթական քառօրյայի օրակարգ ու ավելի հանգամանորեն քննարկվեն բոլոր հարցերը: Փաթեթների վերաբերյալ ԱԺ իրավաբանական վարչությունն էլ վերապահումներ ունի:
«Կառավարությունը նոր քաղաքականության, նոր ծրագրային մշակումների խնդիրների ընթացքում է, բայց այս նախագիծը կարող ենք քննարկել, նաեւ փորձնական առումով նաեւ ներդնել: Առաջարկին չենք առարկում`մտցնենք մեծ օրակարգ, բայց քառօրյայի օրակարգ չընդգրկենք»,- ասաց արդարադատության նորանշանակ նախարարը:
Կարդացեք նաև
Նման կերպով քննարկվեցին եւ մեծ օրակարգում ընդգրկվեցին մի շարք այլ նախաձեռնություններ ևս, քանի որ հետաձգելու ժամկետները լրացել են եւ հարցերը մեծ օրակարգում չընդգրկելով դրանք մեխանիկորեն դուրս էին մնալու:
Նելլի ԳՐԻԳՈՐՅԱՆ
