«Սին են այն բոլոր մտայնությունները, թե հնարավոր է ինչ-որ բան գաղտնի պահել, շվաքի տակ, շղարշի տակ թաքցնել մեր երկրում»,- այսօր խորհրդարանում, «Պետական գնումների մասին» ՀՀ օրենքում և «Պետական և ծառայողական գաղտնիքի մասին» ՀՀ օրենքներում փոփոխություններ և լրացումներ կատարելու մասին օրենսդրական փաթեթի քննարկման ժամանակ ասաց ԱԺ փոխնախագահ Հերմինե Նաղդալյանը`հակադարձելով ՀԱԿ-ի եւ ԲՀԿ-ի պատգամավորների քննադատական ելույթներին:
Նախագիծն առաջարկում է պետական պահպանության ենթակա անձանց սպասարկման ծախսերն իրականացնել գաղտնիության պայմաններում:
«Դա ոչ միայն այն պատճառով, որ մեր երկիրը շատ փոքր է, և բոլորը բոլորի մասին ամեն ինչ գիտեն, ոչ միայն այն պատճառով, որ հանրահայտ է հազարամյակներով, որ ոչ մի բան ի վերջո գաղտնի չի մնում, այլ այն, որ մենք, սիրելի կոլեգաներ, ունենք երդում և այս դահլիճում նստած՝ իրականացնում ենք հանրային վերահսկողություն»,-ասաց տիկին Նաղդալյանը`հավելելով, որ բյուջեն ընդունելու ժամանակ առանձին նիստում մանրամասնորեն քննարկում են բոլոր ծախսերը։
ԱԺ փոխնախագահն այն կարծիքին է, որ ընդդիմադիրներն իրենց ելույթներով «հնչեղ հայտարարություններով», որ ծախսերը փակ են, հանրությանը թյուրիմացության մեջ են գցում: Բանախոսի համոզմամբ, կառավարությունն այս նախագծով, ԱԺ-ի առջև դնում է զուտ օրենսդրական, «այսպես ասած՝ ծավալը հնարավորինս մաքրելու»։
«Այսօր այս օրակարգն իրականացնում ենք, որևէ հրատապություն չկա, ինչպես նաև չկա գաղտնիության որևէ նշույլ մեզ համար, ուզում եմ կրկնել ԱԺ նախագահի այն միտքը, որ գաղտնին դա թաքունը չէ: Թաքնված բանը երբևիցե թաքուն չի մնում: Անվտանգության տեսակետից ավելի ուշադիր պետք է լինել»,-ասաց նա։
Կարդացեք նաև
Նելլի ԳՐԻԳՈՐՅԱՆ
Տեսանյութը «Ա1+»-ի
