Այսօր խորհրդարանը 67 կողմ, 29 ձեռնպահ և 18 դեմ ձայներով` հավանության արժանացրեց կառավարության ներկայացրած լրամշակված նախագիծը` «կուտակայինի» մասին: Նախագիծն ընդունվեց երկրորդ ընթերցմամբ:
Հիշեցնենք, այսպիսով` այն անձինք, ովքեր չեն ցանկանա մասնակից դառնալ պարտադիր կուտակային կենսաթոշակային համակարգին` կարող են դիմումներ ներկայացնել գործատուներին եւ այլեւս վճարումներ չկատարել: Ինչպես նաեւ, այլ դիմումներով էլ կարող են ետ պահանջել մինչ այժմ պահված գումարները: Գործատուների նկատմամբ տույժ-տուգանքներ չեն կիրառվի` վճարումներ չկատարելու համար:
Քվեարկությունից առաջ վարման կարգով հանդես եկավ ՕԵԿ-ական պատգամավոր Հովհաննես Մարգարյանը` ասելով, որ ՕԵԿ-ը ներկայացրել էր առաջարկ այդ նախագծի հետ կապված: ԱԺ նախագահ Գալուստ Սահակյանն ու ՀՀԿ-ական պատգամավոր Հակոբ Հակոբյանը ասացին, որ երեկ հիմնական զեկուցող ՀՀ աշխատանքի և սոցիալական հարցերի նախարար Արտեմ Ասատրյանը հայտարարել է, որ ՕԵԿ-ի առաջարկը չի ընդունվել: Արձագանքելով` Հովհաննես Մարգարյանը նշեց, որ հաշվի առնելով նաև այդ հանգամանքը, որ ՕԵԿ-ի առաջարկը կառավարությունը չի ընդունել, ՕԵԿ-ը դեմ է քվեարկելու այդ նախագծին: Մինչ այդ, առաջին ընթերցման ժամանակ, ՕԵԿ-ը ձեռնպահ էր քվեարկել: Դեմ էին միայն ՀԱԿ-ն ու «Ժառանգությունը»:
Այսօր ձեռնպահ քվեարկեցին ՀՅԴ-ն ու ԲՀԿ-ն:
Կարդացեք նաև
Նելլի ԳՐԻԳՈՐՅԱՆ
