Այսօր Երեւանում մեկնարկեց Եվրոպական Միության եւ Արեւելյան գործընկերության անդամ երկրների միջեւ կլիմայի փոփոխության ոլորտում համագործակցության հարցերին նվիրված միջազգային գիտաժողովը:
Գիտաժողովի ընթացքում ելույթ ունեցավ Հայաստանում ԵՄ պատվիրակության ղեկավար Տրայան Հրիսթեան, որն իր խոսքում նշեց, որ գիտաժողովը լայն հնարավորություն կընձեռի կլիմայի փոփոխության, էներգետիկայի եւ առողջապահության ոլորտների համընդհանուր մարտահրավերները ու դրանց հակազդման համար համատեղ գործողությունները քննարկելու համար: «Գիտաժողովը Եմ եւ Արեւելյան գործընկերության անդամ երկրների միջեւ կխթանի գիտության, տեխնոլոգիաների եւ նորարարության ոլորտներում համագործակցությունը»:
Ողջունի խոսքով հանդես եկան նաեւ Գիտությունների ազգային ակադեմիայի նախագահ Ռադիկ Մարտիրոսյանը, ՀՀ Բնապահպանության փոխնախարար Սիմոն Պապյանը:
Լրագրողների հետ ճեպազրույցում ԳԱԱ նախագահ Ռադիկ Մարտիրոսյանը ասաց, Հայաստանում կլիմայի փոփոխության վերաբերյալ գիտաժողովը մեծ կարեւորություն ունի, քանի որ Հայաստանը գտնվում է սեյսմիկ գոտում. «Անկանխատեսելի կլիմայի պատճառով երբեմն ի հայտ են գալիս արտակարգ դրություններ: Այս տարվա ցուրտը գյուղատնտեսությանը մեծ վնասներ հասցրեց: Հետևաբար` ամբողջ աշխարհի փորձի փոխանակման շնորհիվ գիտելիքներ ենք ձեռք բերում, ոչ միայն գիտական տեսանկյունից, այլ նաեւ կիրառական»:
Մանրամասն՝ տեսանյութում
Կարդացեք նաև
Բնապահպանության փոխնախարար Սիմոն Պապյանը լրագրողներին տեղեկացրեց, որ Հայաստանը մաքուր մեխանիզմների զարգացման ոլորտում բավականին մեծ հաջողություններ է գրանցել եւ տարածաշրջանում նույնպես առաջատար դիրքեր է գրավում: «ՀՀ կառավարությունը հաստատել է միջոցառումների ծրագրեր, որոնցով Հայաստանը ստանձնել է մի շարք պարտավորություններ: Կառավարության նման որոշում վերջին անգամ հաստատվել է 2011 թվականին, եւ այդ որոշմամբ նախատեսվում է երկու կարեւոր միջոցառումների իրականացում՝ մեղմման եւ հարմարվողականության ազգային ծրագրերի իրականացումը»:
Մանրամասն՝ տեսանյութում
Էլյա ՀՈՎՀԱՆՆԻՍՅԱՆ
