Բրիտանական խորհուրդն արդեն չորրորդ տարին է, որ միանում է «Համաեվրոպական գրական գիշեր» նախաձեռնությանը:
Մայիսյան մեկ օր եվրոպական տարբեր քաղաքներ միավորվում են «Համաեվրոպական գրական գիշեր» նախաձեռնության շրջանակում և գրական ընթերցումների միջոցով հանրությանը ներկայացնում եվրոպական գրականության նոր և արդեն դասական դարձած անուններին:
Այս տարի միջոցառմանը միացել են Երևանում Բրիտանական դեսպանատունը, Երևանի մետրոպոլիտենը, Հայ գրականության հիմնադրամը և «Արտբրիջ» սրճարանը:
Դերասան Արսեն Գրիգորյանը, որն արդեն երկրորդ տարին է մասնակցում այս միջոցառմանը, այսօր մետրոպոլիտենի չորս կայարաններում հատվածներ ընթերցեց Միացյալ Թագավորության գրականությունից:
«Շատ ուրախ եմ այս գեղեցիկ միջոցառմանը մասնակցելու համար, որը ոչ միայն հետաքրքիր է, այլև գեղեցիկ խորհուրդ ունի՝ հիշեցնելու ընթերցանության մասին»,- ասում է դերասանը:
Կարդացեք նաև
Քանի որ Ա. Գրիգորյանը մեզ հետ զրույցից առաջ արդեն եղել էր մետրոպոլիտենի երկու կայարաններում, հետաքրքրվեցինք, թե ինչպես են մարդիկ արձագանքում այս միջոցառմանը:
«Սկզբում մարդիկ զարմանում են (նրանք, որոնք տեղյակ չեն): Լինում է, որ գնացքը բաց են թողնում ու հետևում են ընթացքին կամ եթե անգամ բաց չեն թողնում, գնացքին սպասելու ընթացքում են անկախ իրենցից հետևում: Դրական է արձագանքը, մարդիկ հետաքրքրությամբ են նայում»,- ասաց Ա. Գրիգորյանը:
Նա տեղեկացրեց, որ ստեղծագործությունները (Ալիսոն Լյուիս Քենեդի – «Անջնջելի արարքներ», Ջոն Օսբորն – «Ետ նայիր զայրացած», Ռասել Սելին Ջոնս – «Կործանման եզրին», Դեբորա Քեյ Դևիս – «Ինչպիսին որ կամ»), որոնցից հատվածներ է ընթերցում միջոցառման շրջանակներում, Բրիտանական խորհուրդն է ընտրել, և հավելեց, որ այդ հատվածներն իրեն դուր են գալիս ու ստիպում՝ հետո կարդալ մինչև վերջ: Դերասանը համոզված է, որ ոչ միայն իր, այլև այսօր իրեն ունկնդրողներից շատերի մեջ է ցանկություն առաջացել այդ ստեղծագործությունները մինչև վերջ կարդալու կամ այդ հեղինակներին ծանոթանալու:
Սիրանուշ ՀԱՅՐԱՊԵՏՅԱՆ
