Երեկ Մաշտոցի պուրակից ոստիկանություն բերման ենթարկված ակտիվիստ Դվին Իսանյանսի պատմելով, ոստիկանները հենց այգում սադրել են` հայհոյելով ու վիրավորելով՝ ակտիվիստներին ներքաշել վիճաբանության մեջ:
«Փորձում էինք խուսափել դրանից, բայց ոստիկանները սկսեցին հրել, քաշելով տարան փողոց ու ոտքերով հարվածեցին: Քարշ տալով հասցրին ոստիկանական մեքենա, երբ փորձեցի նստել մեքենան, աթոռը ծալված էր ու չկարողացա, ներսից մի ոստիկան դիմացից հարվածեց դեմքիս, ու ես ուշագնաց եղա»,- պատմեց ակտիվիստը:
Ըստ նրա, երբ արդեն սթափվել է` տեսել է, որ իրեն պառկեցրել են մեքենայի հատակին, ոտքերն էլ հայտնվել են առջեւի նստատեղին. «Երբ սթափվեցի, լսեցի` մի ոստիկան հարցնում էր` «կարո՞ղ ա էսի մեռե՞լ ա, մյուսն էլ պատասխանեց` չէ, հլը շնչում ա» : Հենց տեսան, շարժվում եմ, նորից սկսեցին խփել ու հայհոյել»:
Ակտիվիստի պատմելով, ոստիկանները խփելով ու հրելով իրեն մտցրել են ոստիկանության կենտրոնական բաժնի վերելակ. «Բայց երբ մտանք սենյակ, ինձ բերման ենթարկած ոստիկանների վերաբերմունքը կտրուկ փոխվեց, սկսեցին` հարգելի քաղաքացի, նստեք, իսկական թատրոն էր»:
Կարդացեք նաև
Այս պահին ակտիվիստը փաստաբանների հետ քննարկում է իր նկատմամբ բռնություններ կիրառած ոստիկանների նկատմամբ հանցագործության մասին հաղորդում տալու հարցը:
Արփինե ՍԻՄՈՆՅԱՆ
Լուսանկարը՝ www.hetq.am-ի
