Թվում էր, թե խորհրդարանական քառյակը մինչև այս օրենքի նախագծի քննարկումը պետք է նիստ գումարեր և խորհրդարանում հանդես գար միասնական դիրքորոշմամբ, ոչ թե այսպես հակասական և իրարամերժ տեսակետներով ի ցույց դներ քառյակում եղած անհամաձայնությունը:
Բայց մեր ունեցած տեղեկություններով` խորհրդարանական քառյակը չի կարողանում նիստ գումարել, որովհետև քառյակի ներկայացուցիչներն ի սկզբանե հասկանում են, որ իրենք չեն կարողանալու միասնական տեսակետ ունենալ: Քառյակը գործնականում սպառել է իրեն, քանի որ ի վիճակի չէ ձևավորել ընդհանուր օրակարգ: ՀՅԴ-ն և ԲՀԿ-ն բավարարված են վարչապետի և կառավարության փոփոխությամբ, և հիմա իրենց անհրաժեշտ է հնարավորինս հարմար տեղավորվել և շարունակել կիսաընդդիմադիր կիսաիշխանահաճո գործունեությունը:
ՀԱԿ-ը, ընդհակառակը, իրեն տեսնում է արմատական ընդդիմության դերում. համարելով որ պետք է աշխատի չկորցնել արմատական էլեկտորատի քվեները:
ՀԱԿ-ում հասկանում են, որ ԲՀԿ-ի հետ համագործակցությունը որքան էլ օգտակար և հաճելի է կարճաժամկետ հեռանկարում, նույնքան վտանգավոր և կործանարար կարող է լինել առաջիկա խորհրդարանական ընտրություններին նախապատրաստվելու իմաստով:
Կարդացեք նաև
Այդ պատճառով պետք է սպասել, որ շուտով ՀԱԿ-ը ավելի կկոշտացնի իր դիրքորոշումն իշխանության նկատմամբ, մասնավորապես` դնելով Սերժ Սարգսյանի հրաժարականի պահանջը, այդպիսով դիրքավորվելով` որպես ամենաարմատական ընդդիմություն: ԲՀԿ-ն և ՀՅԴ-ն միանգամից կհայտարարեն, որ իրենք տեսականորեն դեմ չլինելով ամբողջական իշխանափոխությանը, այնուամենայնիվ, կարծում են, որ դրան պետք է հասնել հետևողական քայլերի միջոցով, և, բացի այդ, չեն տեսնում այդ պահանջի իրականացման իրավական մեխանիզմներ` բացի ընտրություններից:
Արդյունքում` քառյակի անդամները հրաժեշտ կտան իրար: Կմնա միայն «Ժառանգությունը», որի առաջնորդ Րաֆֆի Հովհանիսյանը ստիպված կլինի միասնական հրապարակ ձևավորելու իր ցանկություն-պահանջը մայիսից տեղափոխել հունիս, ինչպես որ ապրիլից տեղափոխել էր մայիս, և այդպես` բյուր ամիսներ:
ԱՎԵՏԻՍ ԲԱԲԱՋԱՆՅԱՆ
Հոդվածն ամբողջությամբ կարող եք կարդալ «168 ժամ» թերթի այսօրվա համարում
