Արգիշտի Կիվիրյանը, որը մեղադրվում է իշխանության ներկայացուցչի նկատմամբ առողջության համար ոչ վտանգավոր բռնություն կատարելու համար՝ այսօր Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարան էր ներկայացել իր երեք պաշտպանների՝ Լուսինե Սահակյանի, Նիկոլայ Բաղդասարյանի եւ Երվանդ Վարոսյանի հետ:
Դատարան էր ներկայացել նաեւ տուժող ճանաչված ոստիկանը՝ Վահան Վրթանեսյանը:
Սակայն դատավոր Արթուր Մկրտչյանը դատական նիստը ստիպված էր հետաձգել, քանի որ վկաներից երկուսի նկատմամբ թե մեղադրողը, թե պաշտպանական կողմը միջնորդեցին, որպեսզի կայացվի բերման որոշում:
Դատավոր Ա.Մկրտչյանը որոշեց, որ բերման ենթարկեն Հովհաննես Եսայանին եւ Վիդուշ Գրիգորյանին:
Կարդացեք նաև
Լուսինե Սահակյանը հայտնեց, որ վկաներից Եսայանին տեսել է երկու օր առաջ, եւ նա ասել է, թե մեկնելու է հանրապետությունից: Նա խնդրեց, որ ոստիկանությանն այդ մասին անհապաղ տեղեկացվի, որպեսզի հաջորդ դատական նիստին իրենք փաստի առաջ չկանգնեն:
Մեկ այլ վկայի հետ կապված ծավալվեց առանձին խոսակցություն: Արգիշտի Կիվիրյանը հարցրեց, թե ո՞նց է հատուկ քննչական ծառայության քննիչը վկային լսել,երբ նման վկա չի եղել:
Նա դիմեց մեղադրող Երիցյանին, որպեսզի քննիչի միջոցով այդ հարցը բարձրացվի: Խոսքը Վահրամ Մնացականյանի մասին էր, որին եւ նաեւ Հմայակ Փաշայանին կրկին կուղարկվի ծանուցագիր:
Դատական հաջորդ նիստը նշանակվեց մայիսի 22-ին:
Ռուզան ՄԻՆԱՍՅԱՆ
Ինչքա՞ն է շարունակվելու այս խայտառակությունը: Սա արդարադատությո՞ւն է կոչվում: