Այսօր ՀԱԿ երիտասարդ կառույցի համագումարը սկսվեց հայտարարությամբ, որ իրենց կառույցը այսուհետեւ կկոչվի երիտասարդական կոնգրես: Համագումարին 203 պատվիրակ էր գրանցվել:
Երիտասարդական կոնգրեսական Արշակ Մուսախանյանն էլ նկատեց, որ քաղբանտարկյալների ազատ արձակումը իրենց հաղթանակն է. «Քաղբանտարկյալներին ազատ արձակելու մեր խնդիրը համարում ենք կատարված: Եթե անդադար չաշխատեինք նրանց ազատ արձակման համար, Տիգրան Առաքելյանը կմնար բանտում, նրան կմիանային մեր մնացած երիտասարդները»:
Ընտրվել է արդեն հաշվիչ հանձնաժողով, որը կմասնակցի համակարգող խորհրդի ու կոնգրեսի բանաձեւի քվեարկությանը:
Նախքան քվեարկությունը, ՀԱԿ փոխնախագահ Արամ Մանուկյանը երիտասարդ կոնգրեսականներին ոգեւորեց. «Ամենահամարձակն ու ուժեղն եք, ամենակամքով լեցունն եք, այն, որ դուք պահում եք փողոցն ու հասարակության հույսը՝ դա հզոր առաքելություն է: Այն, որ նաեւ հանդուրժող ու համատեղ պայքարի կողմնակիցն եք՝ դրա ապացույցն է, բայց կա մի խնդիր՝ այս կամքն ու համառությունը թույլ է տալիս գալ իշխանության, մենք գալու ենք, որովհետեւ այսպիսի թիմին հնարավոր չէ իշխանությանը չգալ: Հաշվեք այս պահին իշխանության ենք ու պետք է ձեւավորենք իշխանություն, ունենալու ենք դժվարություններ: Հաճախ մեզ համեմատում ենք իշխանական թեւի երիտասարդների հետ, որտեղ՝ Ազգային ժողովում, կառավարությունում տիրում է թույլիկությունը, անբարոյականությունը, նենգությունը, խեղճությունը: Այսօր վարկաբեկվածը ղեկավարում է իշխանությունը: Մենք գալիս ենք գրագետ կադրերով, իշխանություն ձեւավորելու կադրերով ու պայքարելու ենք անգրագիտության դեմ»:
Կարդացեք նաև
Պարոն Մանուկյանը կոչ արեց երիտասարդներին ամեն օր ինքնակրթվել. «Մեզնից շատերը բանտերում էին լեզու սովորում, մեզնից շատերը չկարողացան մասնագիտական վերապատրաստում ստանալ, բայց մեծ մասը ամբողջ ընթացքում ինքնակրթվել է : Ինքնակրթվեք, եղեք մրցունակ ոչ միայն հայաստանյան , այլեւ վաղվա եվրոպական միջազգային չափանիշներով: Մենք գալիս ենք մեր ուժեղությամբ եւ գրագիտությամբ հաղթելու»:
Արփինե ՍԻՄՈՆՅԱՆ
