«Իհարկե, ես ասել եմ թափով Հայաստանը թողեք, գնացեք, հելեք ու ս…տիր եղեք ձեր երկիր»,-Aravot.am-ի հարցին արդյոք ճի՞շտ է վարվել, որ գենդերային հավասարության համար պայքարող ակտիվիստներին Գավառում հայհոյել է, այսպես արձագանքեց «Հայ-ռուսական միավորում» կազմակերպության ղեկավար, նախկին Առաջադիմական սոցիալիստական կուսակցության նախագահ Ռոբերտ Ահարոնյանը:
Հիշեցնենք, որ 2013-ի նախագահական ընտրություններում իր թեկնածությունն առաջադրած Ռոբերտ Ահարոնյանը մեկ օր առաջ կնոջը 9 տարի շարունակ ծեծելու, հոգեբանական և ֆիզիկական ցավ պատճառելու մեջ մեղադրվող 33-ամյա Սարգիս Հակոբյանի գործով դատական նիստից հետո Գավառում` դատարանի բակում անհարգալից էր արտահայտվել ակտիվիստների հասցեին:
Ռոբերտ Ահարոնյանը մեզ հետ զրույցում նշեց, թե համացանցում սխալ տեսանյութ է տարածված ու հորդորեց դիտել այն տեսանյութը, որում երևում է, թե իրեն ինչպիսի «այլանդակ» ձևով են հայհոյում:
Ռոբերտ Ահարոնյանը պատմեց, թե երբ Գավառի դատարանի բակում ինքը հարցազրույց է տվել, իրեն «այդ կանայք մոտեցել, տարբեր ռեպլիկներ են գցել», ինքն էլ խնդրել է իրենց շնորհքով պահել:
Այնուհետև նշեց, թե դատարանի բակում մի տղա ու աղջիկ համբուրվել են «քիչ է մնացել ուրիշ բան էլ անեն», ուստի նրանց հորդորել է շնորհքով կանգնել, քանի որ «գյուղի կենտրոնում են, դատարանի առաջ»:
Կարդացեք նաև
Մեր հարցին՝ անկախ ամեն ինչից արդյոք ճի՞շտ է հայհոյելը, պարոն Ահարոնյանը պատասխանեց. «Ի՞նչ է նշանակում հայհոյել, եթե ես ուղարկել եմ նրան ինչ-որ հասցեով, դա հայհոյա՞նք է: Թափով գնալը բառապաշարով այստեղից գնալը հայհոյա՞նք է: Դուք նայում եք միայն մեկ կողմը: Յուրաքանչյուր ոք, ով քանդում է հայ ընտանիքը և գենդերային հավասարություն մտցնում Հայաստանում, թող թողնի այստեղից գնա: Դուք համարում եք, որ գենդերային հավասարությունը Հայաստան մտցնելը ճի՞շտ պահվածք է ու ճիշտ չէ՞, որ սոցիալիստական շարժման ղեկավարն այդ գենդերին ասում է՝ թափով գնա Հայաստանից, դա բառապաշար է, ես ուղղություն եմ ցույց տալիս արագ գնալու: Ես դեմ եմ գենդերային հավասարությանը, այդ մարդկանց պետք է Հայաստանից վտարել»:
Պարոն Ահարոնյանը նշեց, թե խոնարհվում է այն սփյուռքահայերի առաջ, որոնք մտածում են Հայաստանը ամրապնդելու մասին, նույնիսկ իր մեքենան սփյուռքահայի մոտ է տանում սարքելու: Իսկ այն սփյուռքահայերը, որոնք քանդում են հայ ընտանիքը, ըստ Ահարոնյանի՝ նրանց պետք է վտարել Հայաստանից:
Սփյուռքից Հայաստան եկած ու ՀՀ-ում հաստատված երգիչ Արսեն Գրիգորյանը (Մրո) սփյուռքահայերի նկատմամբ նման պահվածքն այսպես արձագանքեց. «Ընդհանրապես դեմ եմ տարանջատելուն, մեր ժողովրդին ինչ-որ հատվածական դարձնելուն, մենք մեկ ժողովուրդ ենք: Ինձ համար հայը հայ է, կապ չունի, թե նա որ ծննդատանն է ծնվել: Նախ բոլորը սիրով պետք է լցված լինեն իրար նկատմամբ, ու մեր բոլոր խնդիրները լուծվում են, թե չէ կոչ անելով կամ այլ բան անելով չէ, մենք պետք է իրար սիրենք»:
Սփյուռքահայ գործարար, բարերար Վահագն Հովնանյանն այս առիթով նշեց. «Այդ մարդը, եթե խելք ու սիրտ ունի, նրան պիտի հարցնեք, ինձ մի հարցրեք այդ անմարդկային զգացումների մասին: Ես պետք չունեմ դա մեկնաբանելու, ուղղակի ցավում եմ իր համար: Երբեք մտքովս չեմ անցկացնում, թե այս հայը իրաքցի է, մյուսը՝ պարսկահայ, մյուսը՝ Երևանի հայ: Բոլորս էլ Աստծո օրհնյալ ժողովուրդ ենք: Մենք իրավունք չունենք մեկս մյուս հային նշան տալ, թե ինչպիսին ենք: Բոլորս էլ ծնված ենք հորով ու մորով և հայ ենք կոչվում: Եթե իրենք չգիտեն այդ գեղեցկությունը, իրենց խնդիրն է, ոչ թե ժողովրդի»:
Տաթև ՀԱՐՈՒԹՅՈՒՆՅԱՆ
