Ազատամարտիկները հաղթանակի օրվա առիթով այսօր հավաքվել են Ազատության հրապարակում` իրար շնորհավորել: Նրանք հրապարակում տոնել են նաեւ Շուշիի ազատագրման հաղթանակը:
«Մեր հաղթանակն է մայիսի 8-ը, Շուշիի ազատագրումը, մեր հաղթանակը, մեր իսկ գումարներով քրեաօլիգարխիկ իշխանությունների ներկայացուցիչները մեծ սեղաններ են գցում ու լափում են` անտեսելով կռվող տղերքին: Ազատամարտիկին մեծարելը միայն մայիսի 9-ին սրան նրան մի կտոր հաց տա՞լն է: Բա ազատամարտիկի սոցիալական խնդիրները ո՞վ պետք է լուծի: Այսօր ազատամարտիկի տոնն է, բայց ոչ հավես ունի, ոչ էլ տոնական տրամադրություն: Սա՞ է սրանց տոնը»,- դժգոհեց ազատամարտիկ Գագիկ Սարուխանյանը:
Նրա խոսքով, այսօր հրապարակում ազատամարտիկները բացի իրար շնորհավորելուց, իրենց դարդերով են կիսվել. «Մտածում ենք` ոնց ենք անելու, որ ռեժիմին սպանենք: Սա շուտվանից քննարկված բան է, ռեժիմը պետք է հեռանա, թե ինչ ճանապարհով, ոնց, արդեն ընթացիկ գործողություններ են… էնքան ենք բզելու, որ վերջը էս ժողովուրդն արթնանա, մեր խնդիրը հիմա ժողովրդին արթնացնելն է»:
Պարոն Սարուխանյանից հետաքրքրվեցինք`իշխանությունները հաշվի չառա՞ն Վոլոդյա Ավետիսյանին ազատ արձակելու իրենց տված վերջնաժամկետը:
Հիշեցնենք, որ ազատամարտիկները իրենց վերջին հանրահավաքի ժամանակ, որը անցկացրին ՀՀԿ գրասենյակի դիմաց, սպառնում էին, որ եթե մինչեւ մայիսի 9-ը Վոլոդյա Ավետիսյանին ազատ չարձակեն, իրենք կփակեն փողոցները, նստացույց կանեն, կդիմեն կտրուկ գործողությունների:
Կարդացեք նաև
«Դա պահանջ էր, վերջնաժամկետ չէր, աշխարհի վե՞րջն է, ի՞նչ է: Ի՞նչ պետք է անեինք, զենք կամ նռնակներ պետք է վերցնեինք, գնայինք Վոլոդյա Ավետիսյանին ազատեի՞նք: Հիմա ի՞նչ, այս իշխանությունների սրտո՞վ է, որ տոն օրով իր ազատամարտիկները փողոց են դուրս գալիս, փողոցում են տոնը նշում, սա իրենց համար գետինը մտնելու բան է»:
Արփինե ՍԻՄՈՆՅԱՆ
