Քիչ հետո կմեկնարկի Դեմ եմ քաղաքացիական շարժման երթը, որը կսկսվի Մոսկվա կինոթատրոնի մոտից:
Aravot.am-ի հետ զրույցում նախաձեռնության անդամ Դավիթ Մանուկյանը տեղեկացրեց, որ երթը շարունակվելու է Երեւանի կենտրոնական փողոցներով. «Երթը նպատակ ունի բոլոր կառույցներին՝ սկսած Բաղրամյան 26-ից, կառավարությունից մինչեւ Ազգային ժողով, բոլոր նրանցից ում պարտականություն է պաշտպանել սահմանադրական կարգը, ներկայացնել մեր պահանջը: Սա շատ լավ առիթ է նախատոնական օրով հանրությանը կրկին իրազեկելու»:
«Մեր պայքարը այսօր շարունակվում է, որովհետեւ կա իրավական ձեւակերպում, բայց փաստորեն մենք պիտի պայքարենք երկրում դատարանի որոշումը կյանքի կոչելու, որպեսզի այն չմնա թղթի վրա».- ասաց Դավիթ Մանուկյանը եւ հավելեց, որ պետք է հասնեն այն բանին, որ առանց անձի համաձայնության ոչ ոք գումար չգանձի եւ աշխատավարձից չլինեն այդ հինգ տոկոս պահումները:
Դավիթ Մանուկյանը արդյունք չի համարում այն, որ այլեւս տույժեր չեն կիրառվելու: «Ընդամենը անհապաղ պետք է կյանքի կոչել այն օրենքը, որ առանց անձի ստորագրության իրավունք նրա աշխատավարձից պահումներ չլինեն, որպեսզի նրանք չլինեն հակասահմանադրական համակարգի մասնակից, քանի որ օրենքը արդեն իսկ ճանաչվել է հակասահմանադրական» :
Կարդացեք նաև
Նրա կարծիքով երկխոսելը այս իրավիճակում ոչ մի արդյունք չի տա. «Երկխոսությունը համարում են նաեւ հանցավոր համագործակցության նշան»:
Էլյա ՀՈՎՀԱՆՆԻՍՅԱՆ
