Մարդու իրավունքների առաջին պաշտպան Լարիսա Ալավերդյանը հիշեցնում է`ԵԱՀԿ Մինսկի խմբի ամերիկացի համանախագահ Ջեյմս Ուորլիքի հայտարարությունը` Լեռնային Ղարաբաղի շուրջ զբաղեցված տարածքները Ադրբեջանին վերադարձնելու մասին ամրագրված է նաեւ Բիշքեկյան արձանագրություններում եւ նորություն չէր:
«Արձանագրության այդպիսի պարբերությունը թույլ է տալիս` երբ որեւէ կողմ հարմար է գտնում բերի ու դարձնի բանակցային գործընթացի մեխը…երբ Ղարաբաղի Հանրապետությունը հայտարարում է, որ ինքը հանրապետություն է 1994-ից սկսած սահմանների մեջ, ապա Ուորլիքը պարզություն է մտցնում, որ Ամերիկայի քաղաքականությունը դա չի ընդունում, մի կողմ է թողնում, որ պետք է հանրաքվե լինի»,- այսօր «Ֆորում» ակումբում ասաց տիկին Ալավերդյանը:
Նա Ամերիկայի նման դիրքորոշումը պայմանավորում է նաեւ Հայաստանի` Մաքսային միությանն անդամակցելու կողմնորոշմամբ. « Սա ձեւերից մեկն է, որով Ամերիկան արտահայտում է Արեւմուտքի մտքինը, վտանգը կա»:
Տիկին Ալավերդյանը նաեւ հիշեցրեց, որ տարածքների վերադարձման հարց կար նաեւ Մադրիդյան սկզբունքներում. «Որեւէ կասկած չպետք է լինի, որ Մադրիդյան սկզբունքները, որոնք չեն մերժվել Հայաստանի, բայց մերժվել են Լեռնային Ղարաբաղի Հանրապետության ներկայացուցիչների կողմից, այդ հենց նույն Ուորլիքի միտքն են պարունակում»:
Կարդացեք նաև
Նա նաեւ նկատեց, որ ԼՂՀ հիմնահարցի կարգավորման վերաբերյալ առաջին անգամ է Ամերիկան նման կոշտ գնահատական հնչեցրել:
Տիկին Ալավերդյանը նաեւ նկատեց, որ Բիշքեկյան արձանագրություններում տարածքների վերադարձման կետը չփոխեցին Հայաստանի ոչ երկրորդ, ոչ էլ երրորդ նախագահները: Նրա կարծիքով, իշխանափոխությունը ամենահարմար պահն էր նման փոփոխությունների համար:
Արփինե ՍԻՄՈՆՅԱՆ
