«Արաբո» ջոկատի հրամանատար Մանվել Եղիազարյանը ԵԱՀԿ Մինսկի խմբի ամերիկացի համանախագահ Ջեյմս Ուորլիքի հայտարարությունը՝ Լեռնային Ղարաբաղի շուրջ զբաղեցված տարածքները Ադրբեջանին վերադարձնելու մասին, խիստ վտանգավոր է համարում:
«Նա այդ թեզը առաջ է քաշել, որ Ռուսաստանը չփորձի խառնվել Ղարաբաղում այնպիսի խաղեր խաղալ, ինչպիսի խաղեր խաղում է Ուկրաինայում: Դեսպանին կարելի է մեղադրել, որ նա հրահրում է պատերազմ՝ թեւ տալով Ադրբեջանին, թե այն տարածքները, որոնք չեն պատկանել Արցախին, պետք է վերադարձվեն Ադրբեջանին: Վաղն էլ Ադրբեջանը կարող է առանց որեւէ մեկին տեղյակ պահելու իր զորքերը դուրս հանել՝ վերցնելու այդ տարածքները, հետո կասեն, որ Ամերիկան թույլ է տվել»,- այսօր «Զարկերակ» ակումբում ասաց պարոն Եղիազարյանը:
Նրա կարծիքով, երբ Պուտինն ու Օբաման «լեզու գտնեն» Մինսկի համանախագահներն այլ հայտարարություններ կանեն: Նրա խոսքով, տարածքները վերադարձնելու Ջեյմս Ուորլիքի հայտարարությունը պայմանավորված էր Ռուսաստան-Ամերիկա տարաձայնություններով:
Պարոն Եղիազարյանը ԵԱՀԿ Մինսկի ամերիկացի համանախագահի հայտարարությունը նաեւ համարում է Հայաստանի արտաքին սխալ քաղաքականության, վատ բանակցությունների արդյունք. «Լավ բանակցություններ վարելու համար պետք է ուժեղ լինենք, բայց մենք ուժեղ չենք, թույլ ենք, մեզ ինչ ասում են, ընդունում ենք»:
Նա նաեւ համոզված է, որ նոր կառավարության օրոք Հայաստանի դիրքերն ավելի են թուլանալու. «Ավելի վատ է լինելու, ոչ մի լավ բանի մի սպասեք: Ոչ մի բան չի փոխվել որոշ գայլերին փոխարինել են գորշ,կապույտ գայլերով»:
Կարդացեք նաև
Արփինե ՍԻՄՈՆՅԱՆ
