Հայաստանում Ռուսաստանի դեսպան Իվան Վոլինկինը նախօրեին հայտարարել է, թե Ռուսաստանը պետք է «նաեւ այլ մեթոդներով զբաղվի Հայաստանում գործող այն հասարակական կազմակերպությունների չեզոքացմամբ, որոնք ցանկանում են սեպ խրել ռուս-հայկական հարաբերություններում»։ Թե ինչ է նշանակում «այլ մեթոդներով չեզոքացնել»՝ դժվար է ասել, բայց արեւմտյան գրանտներով սնվող ՀԿ-ները երեւի պիտի «սուխարի» չորացնեն եւ տաք շորեր պատրաստեն։
Չի բացառվում, իհարկե, որ ռուս դեսպանի ասածների մեջ ճշմարտության հատիկ կա՝ իսկապես էլ որոշ ՀԿ-ներ կարող են Արեւմուտքից գրանտներ ստանալ՝ հատուկ հայ-ռուսական հարաբերություններում «սեպ խրելու» համար։ Բայց մյուս կողմից էլ՝ «Գազպրոմ-Արմենիա» ընկերությունն, օրինակ, հաստատ Արեւմուտքից գրանտներ չի ստանում, մինչդեռ հենց այդ կազմակերպությունն է խրում ամենամեծ սեպը հայ-ռուսական հարաբերություններում։ Համենայն դեպս՝ ամիսը մեկ, երբ գալիս է գազի եւ էլեկտրաէներգիայի համար վճարելու օրը, ՀՀ ազգաբնակչությունը հենց փոստային բաժանմունքներում բարձրաձայն ասում է այն ամենը, ինչ մտածում է հայ-ռուսական հարաբերությունների մասին։ Ընդ որում՝ ասում է առանց գրանտային ակնկալիքների։
Մարկ ՆՇԱՆՅԱՆ
Հոդվածն ամբողջությամբ կարող եք կարդալ «Չորրորդ իշխանություն» թերթի այսօրվա համարում
