« ՀՀԿ-ն վստահ է իր վրա, ԲՀԿ-ն` իր վրա»,-Aravot.am-ի հարցին` որտեղի՞ց ԲՀԿ-ին նման վստահություն, որ Գագիկ Ծառուկյանը հայտարարում է, թե «Առաջիկա համապետական ընտրություններում հաղթանակը այլևս շրջանցելու է Մելիք-Ադամյան փողոցը» , այսպես պատասխանեց ՀՀԿ խմբակցության պատգամավոր Վարդան Այվազյանը:
Նա, մեկնաբանելով, շարունակեց. «ՀՀԿ-ն ասում է, որ հաջորդ ընտրություններում վճռորոշ դերակատարություն կունենա, վստահ ենք մեր և մեր ժողովրդի վրա, որ մեր կատարած աշխատանքների համար`բացթողումներով հանդերձ, կունենանք մեր համապատասխան գնահատականը և կստանանք առավելագույն ձայներ: Գագիկ Ծառուկյանն էլ ասել է, որ իրենք են ունենալու հաղթանակ: Դրա տակ պետք չէ երկիմաստ բաներ ման գալ»:
Մեր հարցին` դա արդյոք նախազգուշացում չէ՞ այն մասին, որ քառյակն այնքան է ուժեղանալու, որ հաղթանակ տանի, պարոն Այվազյանն արձագանքեց. «Դա շատ նորմալ է, երբ քաղաքական դաշտում գոյություն ունի քաղաքական երկխոսություն, և քաղաքական որոշումներն ու քաղաքական կոնյուկտուրան որոշվում է քաղաքական ջրբաժանների, ոչ թե կառավարություն և քաղաքական ուժեր շրջանակներում: Անգլիայում ասում են` նորին գերազանցություն փոքրամասնությունը: Եթե փոքրամասնությունն ուժեղ է, քաղաքական մեծամասնությունն ավելի զգոն է, բայց չպետք է առաջնորդվել ինչքան վատ, այնքան լավ սկզբունքով»:
Կարդացեք նաև
Վարդան Այվազյանը վստահեցրեց, թե «Այնպես չէ, որ մենք` ընդդիմություն և իշխանություն, իրար նկատմամբ թշմանի ենք»:
Մեր հարցին` այնուամենայնիվ, ԲՀԿ-ին կհաջողվի՞ հաղթանակի հասնել` շրջանցելով Մելիք-Ադամյան փողոցը, պարոն Այվազյանն այսպես պատասխանեց. «Այդ հարցը տվեք Գագիկ Ծառուկյանին: Մենք ՀՀԿ-ականներով ամեն ինչ պիտի անենք և դրա բոլոր նախադրյալները կան, որ ՀՀԿ-ն 2017-ի և 2018-ի ընտրություններում ունենա մեծամասնություն: Դա ցանկացած կուսակցության խնդիրն է, եթե ինքը մտնում է քաղաքական պայքարի մեջ: Կներեք, լուրջ քաղաքական կշիռ չունեցող ուժերն են նույնիսկ հայտարարում, թե մեծամասնություն են դառնալու»: Հարցազրույցին կողքից միջամտեց «Ժառանգություն» կուսակցության անդամ Անահիտ Բախշյանը` նշելով, թե «ձեռքով մեզ ցույց չտաք»: Վարդան Այվազյանն էլ, թե` «ո՞նց կարող ենք ձեզ…»:
Մեր հարցին` իրականում այդ ո՞ւմ նկատի ունի, պարոն Այվազյանը պատասխանեց ծիծաղով:
Տաթև ՀԱՐՈՒԹՅՈՒՆՅԱՆ
