Այսօր Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանում գործով վկա Հենրիկ Զաքարյանը հայտարարեց, թե 2000 ԱՄՆ դոլար է տվել Վոլոդյա Ավետիսյանին:
Վկայի պատմելով, գումարը Ավետիսյանին է հանձնել՝ հոգեկան խնդիրներ ունեցող թոռանը քաղաքին մոտ զորամասում զինծառայության տեղավորելու համար: Ըստ նրա, պայմանավորվածության համաձայն, այդ գումարի մեջ էր մտնում նաեւ թոռան՝ հիվանդանոցում գտնվելու ժամանակ դեղորայքի եւ սնունդի ապահովման ծախսերը:
Հենրիկ Զաքարյանը գործարքի մասին մանրամասները ներկայացնելուց հետո նաեւ խոստովանեց, որ շատ է ուզում Վոլոդյա Ավետիսյանին ազատության մեջ տեսնել, որովհետեւ ի վերջո առողջական խնդիրների համար թոռանը երեք տարվա տարկետում են տվել, իսկ այդ հարցում Վոլոդյա Ավետիսյանի մատը խառը չէ:
Դատախազը միջնորդեց հրապարակել վկայի նախաքննական ցուցմունքը՝ հիմնավորելով, որ էական հակասություններ է տեսնում նրա ցուցմունքի մեջ:
Կարդացեք նաև
Դատարանը բավարարեց միջնորդությունը: Զաքարյանը նախաքննական ցուցմունքի ժամանակ պատմել էր, որ Վոլոդյա Ավետիսյանը իրենից 1500 դոլար է պահանջել քաղաքին մոտ զորամասում թոռան ծառայությունը կազմակերպելու համար, իսկ ծառայությունից ազատելու համար՝ 5000 դոլար:
Նա նաեւ ասել էր, որ Վոլոդյա Ավետիսյանի հետ վերջնական զրույցի ժամանակ Ավետիսյանը պահանջել էր 2000 դոլար եւ երկու տուփ սուրճ, ավելի ուշ ինքն անձամբ է որդու տվյալները հեռախոսով փոխանցել:
Վոլոդյա Ավետիսյանի պաշտպան Արա Զաքարյանն էլ դատավոր Լեւոն Ավետիսյանի ինքնաբացարկի միջնորդություն ներկայացրեց: Այն մերժվեց բավարար հիմքերի բացակայության պատճառաբանությամբ:
Դատական նիստին ներկա Վոլոդյա Ավետիսյանն էլ դժգոհեց, որ առողջական խնդիրներ ունի, բայց Նուբարաշեն ՔԿՀ-ում նրան բուժում չեն նշանակել: Դատավորն էլ խոստացավ ինքն էլ գրություն ուղարկի բուժման համար:
Գործով դատական հաջորդ նիստը նշանակվեց մայիսի 21-ին։
Արփինե ՍԻՄՈՆՅԱՆ
