«Ես իմ ընտրած պատգամավորներից պահանջում եմ ներկայացնել երկամյա գործունեության մասին հաշվետվություն, քանի որ պատգամավորից ընտրողն իրավունք ունի պահանջել հաշվետվություն»,-Aravot.am-ի հարցին` ո՞րն է Ստեփան Դեմիրճյանի տան դիմաց կազմակերպված ակցիայի նպատակը, այսպես պատասխանեց քաղաքացիական ակտիվիստ Վարդգես Գասպարին:
Նա համապատասխան պաստառով մեկ ժամ կանգնեց Ստեփան Դեմիրճյանի տան առաջ: Մեր մյուս հարցին` ինչո՞ւ հենց Ստեփան Դեմիրճյանի տան դիմաց, և ինչո՞ւ է ՀԱԿ պատգամավորներից հաշվատվություն պահանջում՝ գուցե կասկածնե՞ր ունի, պարոն Գասպարին պատասխանեց, թե ուզում է ներդնել այն մշակույթը, որ ընտրողի առաջ պետք է հաշվետվու լինի պատգամավորը: Այնուհետև մանրամասնեց. «Ակցիան անում եմ հենց Ստեփան Դեմիրճյանի տան դիմաց , քանի որ ՀԱԿ պատգամավորական խմբակցությունից մարդու իրավունքների հանձնաժողովում հենց ինքն է ներկայացուցիչը: Հաջորդը ակցիա եմ անելու Լևոն Զուրաբյանի և Արամ Մանուկյանի տների դիմաց»:
Վարդգես Գասպարին մեզ հետ զրույցում, գնահատելով ՀԱԿ խմբակցության աշխատանքները, նշեց. «Ինձ համար առավել տեսանելի է Նիկոլ Փաշինյանի, Հրանտ Բագրատյանի պատգամավորական գործունեությունը, և մասամբ բավարարում է Արամ Մանուկյանի գործունեությունը: Խումբը քաղաքական հանդիպումներ է ունենում, բայց անկեղծ ասած` դա ինձ չի հուզում: Օրինակ` մի քանի օր առաջ բանակում զոհվածների մայրերին ոստիկանները քաշքշելով, տանելով գետնին գցեցին, ինձ հետաքրքրում է՝ իմ ընտրած պագամավորներին հետաքրքրո՞ւմ է դա, թե` ոչ»: Մեր հստակեցմանը, թե բացի այն անուններից, որոնց տեսանելի գործունեության մասին խոսեցիք, մյուսների աշխատանքից դժգո՞հ եք, պարոն Գասպարին պատասխանեց. «Չէի ասի, որ գոհ եմ: Լևոն Զուրաբյանի և Ստեփան Դեմիրճյանի գործունեության մասին ընդհանրապես տեղյակ չեմ: Լևոն Զուրաբյանին ֆեյսբուքով գրել եմ, թե՝ ի՞նչ է նշանակում շանս տալ Գևորգ Կոստանյանին: Նա եղել է ՄԻԵԴ-ում Հայաստանի ներկայացուցիչը. ամենաակնհայտ փաստերը ամենալկտի ձևով նա հերքում է, մասնավորապես կոնկրետ իմ նկատմամբ, որ կալանավայրում խոշտանգումների եմ ենթարկվել, բայց ՄԻԵԴ-ի հարցին ի պատասխան, Գևորգ Կոստանյանն ասել է, թե Գասպարին չի դիմել: Կարո՞ղ է այդ ամենին պատգամավորն անտեղյակ լինել և ասել, որ մի շանս էլ նրան տանք»:
ՀԺԿ վարչության քարտուղար Ստեփան Մինասյանը Գասպարիի ակցիան շինծու համարեց ու ասաց, թե «այդ էժանագին թատրոնի մասնակիցը չեն լինի»: Այնուհետև մանրամասնեց. «Գասպարին եղել է մեր կուսակցության գրասենյակում, իրեն առաջարկվել է, որ ցանկացած հետաքրքրող հարցով ինքը կարող է գալ գրասենյակ ու դիմել, բայց հետագայում հարց կամ հարցադրում իր կողմից չի եղել: Ես այս ակցիան կհասկանայի այն դեպքում, երբ որևէ անձ մերժվեր կամ հարցումն արհամարհվեր, բայց երբ մարդուն առաջարկում ես, չեմ հասկանում ակցիայի իմաստը: Անկախ նրանից սա ուղղորդված է, թե` ոչ, սա պրովոկացիայի նման բան է»:
Կարդացեք նաև
Մեր հարցին` ի վերջո հաշվետվություն տրամադրվելո՞ւ է, պարոն Մինասյանը պատասխանեց. «Ստեփան Դեմիրճյանի ողջ քաղաքական գործունեությունը 15 տարիների ընթացքում նվիրված է եղել մարդու իրավունքների պաշտպանությանը, և դա եղել է հրապարակային: Եթե խոսենք մարդու իրավունքների խախտումից, ապա առաջինը նրա իրավունքներն են խախտվել, երբ ընտրվել է նախագահ, բայց ընտրությունները կեղծվել են ու նրան չեն թողել դառնալ նախագահ: Ես այս ակցիայում նաև անբարո բան եմ տեսնում: Միայն այս երկրի պատմության հետ կապ չունեցող մարդը կարող է Կարեն Դեմիրճյանի հուշատախտակի դիմաց նման ակցիա կազմակերպել»:
Aravot.am-ը Վարդգես Գասպարիից հետաքրքրվեց` ինչո՞ւ չի դիմել ՀԺԿ՝ իրեն հուզող հարցերի պատասխանները ստանալու համար, պարոն Գասպարին պատասխանեց. «Մեկ անգամ հանդիպման հրավեր եղավ, որը Ստեփան Դեմիրճյանի հետ պիտի հանդիպեինք, բայց ասացին, որ նա վատառողջ է ու չի եկել: Ես այն ժամանակ կոնկրետ պահանջ ունեի, թե նա ինչու թեկուզ մեկ անգամ չի մասնակցում Վոլոդյա Ավետիսյանի դատավարությանը: Ես կարծում եմ, որ վատառողջությունը երկարատև էր, և մի քանի դատ է եղել, և նա չի մասնակցել ընդհանրարապես: Ես նրան ֆեյսբուքյան էջով եմ դիմել, բայց ոչ մի արձագանք»:
Նշենք, որ ակցիայի ընթացքում Ստեփան Դեմիրճյանը տանը չէր, նրանց տան պատուհանից մեկ անգամ դուրս նայեցին ու այնուհետև այդպես էլ ոչ ոք չերևաց:
Վարդգես Գասպարին «Սերժիկ մարդասպան, Սերժիկ սրիկա» խորագրով ամեն օր ժամը 18.00-ից հետո և 09.00-ից առաջ պիկետ է անում Պռոշյան- Դեմիրճյան խաչմերուկում:
Տաթև ՀԱՐՈՒԹՅՈՒՆՅԱՆ
