Քաղաքական տեխնոլոգ Կարեն Քոչարյանը ուզում է հավատալ, որ նոր կառավարությունն ավելի պրագմատիկ է, քան՝ նախորդը:
«Գործ անելու առումով ավելի ոտքերը գետնին կպած, իրականությանը ավելի մոտ են: Այս կառավարությունն ավելի իրական է այն համակարգին, որը գործում է Հայաստանում վերջին քսան տարում»,- այսօր «Անալիտիկ» ակումբում ասաց Կարեն Քոչարյանը:
Իսկ Հովիկ Աբրահամյանին էլ համարեց գործող համակարգի համար ամենաներդաշնակ վարչապետի թեկնածուն:
Անդրադառնալով նորանշանակ որոշ նախարարների նշանակումներին ու հայտարարություններին, թե Ռոբերտ Քոչարյանի մարդիկ են իշխանության գալիս՝ ասաց. «Ի՞նչ է նշանակում՝ Ռոբերտ Քոչարյանի մարդիկ են, այդ մարդիկ վերջին վեց տարում անգործ չեն եղել, եղել են իշխանության, կառավարության ներկայացուցիչներ, հանրապետականներ, ՀՀԿ-ն, չեմ կարծում, թե Ռոբերտ Քոչարյանինն է»:
Կարդացեք նաև
ՕԵԿ-ի գործելաոճի մասին նա ընդհանրապես չցանկացավ խոսել՝ ասելով, թե «մեռածների մասին կամ լավը կամ ոչինչ».«Ես գերադասում եմ լռել քաղաքական դիակի մասին»:
Ֆինանսների նախարարության եւ ՊԵԿ-ի միավորումն էլ նա համարեց Արեւմուտքի լոբբինգի արդյունք. «100 %-ով գիտեմ՝ ՊԵԿ-ի ու Ֆինանսների նախարարության միացման լոբբինգը արել են Համաշխարհային բանկն ու IREF-ը, որովհետեւ աշխարհում ընդունված մոդելներից է, որ ծախսող ու հավաքող կառուցվածքները նույն կտուրի տակ լինեն: Մամուլում էլ լուրեր են պտտվում, թե Համաշխարհային բանկը միացումից դժգոհ է: Հիմա ինչի՞ց են բողոքում»:
Վերջում էլ ԱԺ նախագահի պաշտոնում առաջադրված Հրանտ Բագրատյանի քայլը մեկնաբանեց՝ այն համարելով քաղաքական ռոմանտիզմ. «Առաջադրվեց, լավ արեց, բայց իմ կարծիքով դրանով մթնոլորտ չեն կոտրում, մի բան է, երբ անհատն է ռոմանտիկ, մի այլ բան է, երբ ռոմանտիզմով սկսում է տառապել մի ամբողջ քաղաքական ուժ, ախր ինչի՞ համար առաջադրվեն, եթե շանս չունեն»:
Արփինե ՍԻՄՈՆՅԱՆ
