Ծանրամարտի Հայաստանի տղաների հավաքականը Չեխանովում Եվրոպայի պատանեկան առաջնությունն սկսեց եւ ավարտեց ոսկե մեդալով:
Գերծանր քաշային Սիմոն Մարտիրոսյանն այսօր մի քանի գլխով բարձր էր մրցակիցներից: Պոկում վարժությունում հայ ծանրորդը 160 կիլոգրամին առաջին մոտեցումը կատարեց այն ժամանակ, երբ բոլորն արդեն ավարտել էին մրցելույթները: Ու միայն այդ մեկ մոտեցումը նրան բերեց փոքր ոսկե մեդալ:
Դրանից հետո Սիմոնը միանգամից 10 կգ-ով ավելացրեց ծանրաձողի քաշը ու կրկին բավականին հեշտությամբ այն պահեց գլխավերեւում: Թվում էր, թե նա ուժերը կխնայի երկրորդ վարժության համար: Սակայն երրորդ մոտեցման համար պատվիրեց 182 կգ, որը մեկ կիլոգրամով գերազանցում էր Գոռ Մինասյանին պատկանող պատանիների աշխարհի ու Եվրոպայի ռեկորդը, ու այն այսուհետեւ գրանցեց իր անվան դիմաց:
Միայն առաջին վարժությունից հետո Սիմոն Մարտիրոսյանը մոտակա մրցակցին՝ սերբ Թամաշ Կայդոշիին գերազանցում էր ամբողջ 27 կիլոգրամով:
Հրում վարժությունում Սիմոն Մարտիրոսյանի 200 կգ նախնական պատվերը 20 կգ-ով ավելի էր բոլորից: Ու այստեղ էլ պատկերը գրեթե նույնությամբ կրկնվեց: Սկսելով այս անգամ 195 կգ-ից եւ ապահովելով չեմպիոնի կոչումը՝ Մարտիրոսյանը երկրորդ մոտեցման համար պատվիրեց միանգամից 215 կգ, որը բարձրացնելով (երկամարտում՝ 397 կիլոգրամ) 2 կգ-ով գերազանցեց նաեւ իր մյուս հայրենակցի՝ Ռուբեն Ալեքսանյանի, երկամարտի Եվրոպայի (395) եւ 1 կգ-ով էլ չինացի Չե Յանգի (396)՝ աշխարհի ռեկորդը: Միակ «ձախողումը» եղավ վերջին փորձը 221 կիլոգրամին, որը հրումում աշխարհի ու Եվրոպայի նոր ռեկորդ կլիներ:
Կարդացեք նաև
Աշոտ ՀԱԿՈԲՅԱՆ
