«Ժառանգություն» կուսակցության գլխավոր քարտուղար Ստյոպա Սաֆարյանի գնահատմամբ, Հայաստանն արտաքին քաղաքական դաշտում անցնում է «ոչ, ոչ»-ի քաղաքականությանը: Ըստ նրա՝ իշխանությունների պնդումները, թե իրենք «և,և»-ի քաղաքականություն են իրականացնում, իրականությանը չեն համապատասխանում:
Այսօր «Փաստարկ» ակումբում Ստյոպա Սաֆարյանը նկատեց, որ ապրիլի 4-ից Հայաստանի քաղաքական խնդիրների լուծման համար time out-ի փուլ է սկսվել. «Ոչ՛ Եվրոպական ասոցացման քաղաքականությանը, ո՛չ Մաքսային միությանը»:
Անդրադառնալով կառավարության կազմավորմանը՝ Ս. Սաֆարյանն ասաց, որ որքան էլ նշանակված նախարարները ծանոթ դեմքեր են հանրության համար, այնուամենայնիվ, պիտի ամփոփել՝ նկատի ունենալով, որ վաղը կառավարության ձևավորման վերջնաժամակետն է. «Հետևաբար, կարելի է հետևություններ անել: Այս կառավարությունը ես համարում եմ օլիգարխիայի կառավարություն մի շարք պատճառներով: Նշանակված դեմքերի զգալի մասը ուղղակիորեն կամ անուղղակիորեն հարում են խոշոր գործարար շրջանակի, որը նաև քաղաքական իշխանություն ունի և, հետևաբար, ուշագրավ է դառնում այդ առումով նրանց առջև դրված խնդիրը»:
Պարոն Սաֆարյանը բացատրեց՝ խնդիրներ ասելով նկատի ունի տնտեսական աճին, մարդկանց վստահությանն ուղղված նախատեսված բարեփոխումները.«Առաջադրանքներ, որոնք որպես նվազագույն խնդիրներ ձևակերպվեցին Սերժ Սարգսյանի կողմից ապրիլի 4-ին՝ Կենտրոնական բանկում»:
Կարդացեք նաև
Ըստ նրա, Հայաստանը բարեփոխումների կարիք ունի, բայց կառավարության այս կազմը ի վիճակի չի լինի իրագործել այդ բարեփոխումները. «Հետևաբար, չեմ տեսնում, որ նրանք փոխելու են Հայաստանում վարվող սոցիալ-տնտեսական քաղաքականության խաղի կանոնները… նրանք համապատասխան գիտելիքներ էլ չունեն»:
Ինչ վերաբերում է ԱԺ նախագահի ընտրությանը, ասաց՝ իր համար անակնկալ չի եղել, իսկ հրաշալի քառյակի ոչ միասնական մոտեցումը նա համարեց օրակարգի բացակայության արդյունք:
Նա անդրադարձավ նաեւ ՀՀԿ խոսնակ Էդուարդ Շարմազանովի վերջին հայտարարությանը, թե առաջիկա տասը տարում լուրջ քաղաքական հավակնություններ ունեցողների ճանապարհը ՀՀԿ–ն է, ասաց իր տպավորությամբ հականախագահական հայտարարություն էր. «Եթե խոսում է այն մասին , որ պետք է ժողովրդի վստահությունը վերականգնի, չեմ կարծում, որ վերականգնելու քայլ է, երբ ՀՀԿ խոսնակը հայտարարում է՝ մեզնից պրծում չկա»,- ասաց նա ու այդ ուղերձը որակեց հականախագահական:
Արփինե ՍԻՄՈՆՅԱՆ
